काठमाडौं । सानिगाड हाइड्रो लिमिटेडले आज चैत ८ गतेदेखि आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि प्रारम्भिक सार्वजनिक निष्काशन (आईपीओ) खुला गरेको छ।

कम्पनीले प्रतिकित्ता १०० रुपैयाँका दरले कुल ८५ लाख ५० हजार कित्ता आईपीओ निष्काशन गर्न अनुमति पाएको हो। सोमध्ये हाल २८ लाख ५० हजार कित्ता आयोजना प्रभावित स्थानीयका लागि र ५ लाख ७० हजार कित्ता वैदेशिक रोजगारीमा रहेका नेपालीहरूका लागि छुट्याइएको छ।

आयोजना प्रभावितका लागि छुट्याइएको सेयरमध्ये १८ लाख ५२ हजार ५०० कित्ता अति प्रभावित क्षेत्र अन्तर्गत बझाङको बुंगल नगरपालिका वडा नम्बर १, २ र ४ का बासिन्दाले आवेदन दिन सक्नेछन्। यस्तै, ९ लाख ९७ हजार ५०० कित्ता प्रभावित क्षेत्र अन्तर्गत वडा नम्बर ३, ५, ६, ७, ८, ९, १० र ११ का स्थानीयका लागि छुट्याइएको छ।

यस आईपीओमा आवेदन दिँदा न्यूनतम १० कित्ता र अधिकतम २० हजार कित्तासम्म माग गर्न सकिने व्यवस्था गरिएको छ। आयोजना प्रभावित स्थानीयले चैत २२ गतेसम्म आवेदन दिन सक्नेछन् भने वैदेशिक रोजगारीमा रहेका नेपालीहरूले चैत ११ गतेसम्म आवेदन दिन पाउनेछन्।

आवेदन दिन चाहने आयोजना प्रभावित स्थानीयहरूले बुंगल नगरपालिकास्थित कम्पनीको पावर हाउस, लक्ष्मी सनराइज बैंकको चैनपुर शाखा, साथै ग्लोबल आइएमई बैंक, राष्ट्रिय वाणिज्य बैंक र कृषि विकास बैंकका बझाङस्थित शाखा कार्यालयबाट आवेदन फाराम प्राप्त गरी बुझाउन सक्नेछन्।

उक्त आईपीओको धितोपत्र निष्काशन तथा बिक्री प्रबन्धकको रूपमा लक्ष्मी सनराइज क्यापिटल लिमिटेड रहेको छ।