काठमाडौं । नेपाल एसबिआई बैंक लिमिटेडले ग्लोबल मनी वीक २०२६ को अवसरमा देशका विभिन्न ४४ स्थानमा वित्तीय साक्षरता कार्यक्रम सञ्चालन गरेको छ। ‘Smart Money Talks’ भन्ने नारासहित चैत्र २ देखि ८ गतेसम्म आयोजना गरिएको उक्त कार्यक्रममा ३ हजारभन्दा बढी विद्यार्थी तथा युवाहरू लाभान्वित भएका छन्।

बैंकका अनुसार सातै प्रदेशका विभिन्न विद्यालय तथा कलेजमा सञ्चालन गरिएको कार्यक्रममा विद्यार्थीहरूलाई बचतको महत्व, ऋण तथा लगानी, डिजिटल बैंकिङ, डिजिटल ठगीसम्बन्धी सचेतना लगायत आधारभूत बैंकिङ तथा वित्तीय अवधारणाबारे जानकारी प्रदान गरिएको थियो।

कार्यक्रम कोशी प्रदेशको इटहरी, भोजपुर, विराटनगर, बिर्तामोड, इलाम, दमक र फिदिम, मधेस प्रदेशको सिमरा, बर्दिबास, वीरगञ्ज, चन्द्रनिगाहापुर, राजगढ, पिडारी चौक र जनकपुर, बागमती प्रदेशको पाटन, धादिङ, नारायणगढ र हेटौंडा लगायत स्थानमा सञ्चालन गरिएको बैंकले जनाएको छ।

यसैगरी गण्डकी, लुम्बिनी, कर्णाली तथा सुदूरपश्चिम प्रदेशका विभिन्न सहरहरूमा समेत कार्यक्रम आयोजना गरिएको थियो। देशभर सञ्चालन गरिएका यी कार्यक्रममार्फत विद्यार्थी र युवाहरूमा वित्तीय सचेतना अभिवृद्धि गर्न मद्दत पुगेको बैंकको विश्वास छ।

३२ वर्षदेखि बैंकिङ सेवा प्रदान गर्दै आएको बैंकका हाल १०२ शाखा, २२ एक्स्टेन्सन काउन्टर, ७ प्रादेशिक कार्यालय, २१ शाखारहित बैंकिङ सेवा, १२७ एटिएम र एक कर्पोरेट कार्यालय सञ्चालनमा रहेका छन्।