काठमाडौं, वैशाख — ICT Foundation Nepal ले ५० भन्दा बढी प्रारम्भिक चरणका स्टार्टअपलाई लक्षित गर्दै इन्क्युबेसन कार्यक्रम सञ्चालन गर्ने भएको छ। कार्यक्रममार्फत मेन्टरशिपदेखि लगानीसम्मको सहयोग उपलब्ध गराइनेछ।

यसका लागि Industrial Enterprise Development Institute ले आईसीटी फाउन्डेसनलाई बिजनेस इन्क्युबेसन सर्भिस कार्यक्रम सञ्चालन गर्न चयन गरेको हो।

कार्यक्रम काठमाडौं उपत्यका र इटहरी केन्द्रित रहनेछ। मार्चदेखि जुन २०२६ सम्म सञ्चालन हुने यो कार्यक्रम हाइब्रिड मोडलमा चलाइनेछ।

यसअन्तर्गत सहभागी स्टार्टअपहरूले विशेषज्ञबाट व्यक्तिगत मेन्टरशिप, क्षमता विकास तालिम, व्यवसाय विकास सहयोग तथा लगानीका लागि तयारी सम्बन्धी मार्गदर्शन प्राप्त गर्नेछन्।

आयोजकका अनुसार यो कार्यक्रमको उद्देश्य राजधानी बाहिर पनि उद्यमशीलता विस्तार गर्नु हो। विशेषगरी कम अवसर पाएका क्षेत्रका उद्यमीलाई समेटेर नवप्रवर्तनलाई बलियो बनाउने लक्ष्य राखिएको छ।

छनोट भएका स्टार्टअपलाई उद्योग विशेषज्ञसँग प्रत्यक्ष सम्पर्क, व्यावहारिक तालिम र नेटवर्किङ अवसर प्रदान गरिनेछ। यसले उनीहरूलाई आफ्नो व्यवसाय सुधार गर्न र बजार विस्तार गर्न सहयोग पुग्ने अपेक्षा गरिएको छ।

उत्कृष्ट प्रदर्शन गर्ने स्टार्टअपलाई सिड इन्भेस्टमेन्ट सहयोगका साथै राष्ट्रिय स्तरका कार्यक्रमहरूमा सहभागी हुने अवसर पनि दिइनेछ।

यस कार्यक्रममार्फत नेपालमा समावेशी र नवप्रवर्तन–केन्द्रित स्टार्टअप इकोसिस्टम विकास गर्ने लक्ष्य लिइएको आयोजकले जनाएको छ।