काठमाडौं  । आइएमईले वैदेशिक रोजगारीमा रहेका नेपाली तथा उनीहरूका परिवारलाई लक्षित गर्दै ‘रेमिटमा बेनिफिट’ नामक नयाँ ग्राहकलाभ योजना सार्वजनिक गरेको छ । यो योजना सामसङ नेपालको सहकार्यमा सञ्चालन गरिएको हो ।

योजना अन्तर्गत अब आइएमईमार्फत विदेशबाट नेपालमा रेमिट्यान्स पठाउने ग्राहकहरूले सामसङका विभिन्न इलेक्ट्रोनिक सामान खरिद गर्दा विशेष छुट, क्यासब्याक तथा अन्य आकर्षक सुविधा प्राप्त गर्न सक्नेछन् ।

यस योजनाको लाभ लिन ग्राहकहरूले सर्वप्रथम IME Remit मार्फत विदेशबाट नेपालमा रकम पठाउनुपर्नेछ । त्यसपछि नेपालमा पैसा प्राप्त गर्दा प्रयोग भएको IME Control Number सुरक्षित राखेर सामसङको आधिकारिक स्टोर वा डिलरकहाँ पुग्नुपर्नेछ ।

ग्राहकहरूले आफूलाई आवश्यक सामसङ स्मार्टफोन वा अन्य घरेलु उपकरण छनोट गरी HFL मार्फत सहज EMI वा ऋण सुविधा प्रयोग गरेर खरिद गर्न सक्नेछन् । कम्पनीका अनुसार EMI सुविधा २४ महिनासम्म उपलब्ध हुनेछ ।

साथै स्मार्टफोन, स्मार्ट टिभी, रेफ्रिजेरेटर, वासिङ मेसिन लगायतका उपकरण खरिद गर्दा ग्राहकहरूले अधिकतम ६ प्रतिशतसम्म क्यासब्याक खल्ती बाइ आइएमई वालेटमा प्राप्त गर्न सक्ने व्यवस्था गरिएको छ ।

त्यसैगरी सामसङ स्मार्टफोन खरिद गर्ने ग्राहकहरूले एनसेल प्याक सक्रिय गर्दा अधिकतम १८० जीबीसम्म बोनस डेटा सुविधा पनि प्राप्त गर्न सक्नेछन् ।

आइएमईका प्रमुख कार्यकारी अधिकृत दिवाकर पौडेलले वैदेशिक रोजगारीमा रहेका नेपाली कामदार तथा उनीहरूका परिवारको दैनिक जीवनलाई सहज र प्रविधिमैत्री बनाउने उद्देश्यले योजना ल्याइएको बताए ।

कम्पनीका अनुसार यस अभियानमार्फत ग्राहकहरूले आधुनिक प्रविधियुक्त सामसङका उत्पादनहरू अझ सहज, किफायती तथा लाभदायक रूपमा खरिद गर्न सक्ने अपेक्षा गरिएको छ ।

हाल आइएमईले देशभर २२५ आइएमई सेन्टर, १२ हजारभन्दा बढी सब–एजेन्ट तथा बैंक तथा वित्तीय संस्थाका शाखामार्फत रेमिट्यान्स सेवा प्रदान गर्दै आएको जनाएको छ ।