काठमाडौं । हिमालयन लाइफ इन्स्योरेन्स लिमिटेडले चालु आर्थिक वर्ष २०८२/०८३ को तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ।

सार्वजनिक विवरणअनुसार कम्पनीले जीवन बीमा कोष, खुद बीमा शुल्क आम्दानी तथा बीमा व्यवसाय विस्तारमा सकारात्मक वृद्धि हासिल गरेको देखिएको छ। कम्पनीको जीवन बीमा कोष गत आर्थिक वर्षको सोही अवधिको तुलनामा १६.७१ प्रतिशतले वृद्धि हुँदै ८६ अर्ब ९ करोड ९२ लाख रुपैयाँ पुगेको छ। अघिल्लो वर्ष यही अवधिमा कोष ७३ अर्ब ७७ करोड १९ लाख रुपैयाँ रहेको थियो।

यद्यपि, कम्पनीको खुद नाफा भने घटेको छ। अघिल्लो वर्ष ४७ करोड २४ लाख रुपैयाँ रहेको नाफा ४४.६६ प्रतिशतले घटेर २६ करोड १४ लाख रुपैयाँमा झरेको छ।

समीक्षा अवधिसम्म कम्पनीले १ अर्ब २९ करोड ३६ लाख रुपैयाँ खुद बीमा शुल्क आर्जन गरेको छ, जुन अघिल्लो वर्षको तुलनामा ६.१८ प्रतिशतले बढी हो। अघिल्लो वर्ष यस्तो आम्दानी १ अर्ब २१ करोड ८३ लाख रुपैयाँ थियो। बीमा शुल्क आम्दानीमा भएको वृद्धिले कम्पनीको बजार पहुँच र व्यवसायिक गतिविधि विस्तार भइरहेको देखाउँछ।

कम्पनीको कुल आम्दानी १७ अर्ब ५९ करोड ४७ लाख रुपैयाँ पुगेको छ भने कुल खर्च १६ अर्ब ९० करोड २३ लाख रुपैयाँ रहेको छ। त्यस्तै अभिकर्तालाई दिइने कमिसन खर्च ५.७३ प्रतिशतले बढेर १ अर्ब ४ करोड ३० लाख रुपैयाँ पुगेको छ।

यस अवधिमा कम्पनीको प्रतिशेयर आम्दानी ६.८९ रुपैयाँबाट घटेर ३.८१ रुपैयाँ कायम भएको छ भने प्रतिशेयर नेटवर्थ १००.४५ रुपैयाँ रहेको छ। जगेडा कोष ४१.७४ प्रतिशतले वृद्धि भई ९९ करोड ६३ लाख रुपैयाँ पुगेको छ, जुन अघिल्लो वर्ष ७० करोड २९ लाख रुपैयाँ थियो।

त्यसैगरी, महाविपत्ति कोष पनि बढेर ४६ करोड ६६ लाख रुपैयाँ पुगेको छ। कम्पनीको चुक्ता पूँजी ९ अर्ब १४ करोड ३२ लाख रुपैयाँ रहेको छ।