काठमाडौं। आइएमई खल्ती लिमिटेडले ‘आईएमई प्रेजेन्ट्स खल्ती इन्फ्लुएन्सर अवार्ड’ को घोषणा गरेको छ। डिजिटल सामग्री उत्पादक (क्रिएटर) हरूलाई लक्षित गर्दै सुरु गरिएको यो मञ्च नेपालकै पहिलो राष्ट्रिय सम्मान कार्यक्रम भएको कम्पनीले जनाएको छ।

कम्पनीका अनुसार यो अवार्डले नेपालमा क्रिएटर इकोनोमीलाई संस्थागत गर्न सहयोग गर्नेछ। कार्यक्रममार्फत २०० भन्दा बढी प्रभावशाली क्रिएटरहरूलाई राष्ट्रिय पहिचान, ब्रान्ड साझेदारीका अवसर तथा नयाँ प्रतिभाको प्रोत्साहन दिने उद्देश्य राखिएको छ।

अवार्डका चार चरण निर्धारण गरिएको छ। पहिलो चरणमा वैशाख १ देखि असार १ सम्म खल्ती एपमार्फत निःशुल्क दर्ता गर्न सकिनेछ। त्यसपछि असार १ देखि १० सम्म मूल्याङ्कन गरी शीर्ष १०० क्रिएटर छनोट गरिनेछ।

तेस्रो चरणमा असार ११ देखि साउन १६ सम्म भोटिङ तथा कन्टेन्ट च्यालेन्ज हुनेछ, जसमा क्रिएटरहरूले आफ्ना सामग्री प्रस्तुत गर्नेछन्। अन्तिममा साउन १६ गते काठमाडौंमा ग्रान्ड फिनाले आयोजना गरी विजेताहरू घोषणा गरिनेछ।

कम्पनीले लिइएका यी पहलहरूले डिजिटल क्रिएटरहरूलाई व्यावसायिक रूपमा अघि बढ्न मद्दत गर्ने र नेपालमा सिर्जनशील डिजिटल इकोसिस्टम विकासमा योगदान पुर्‍याउने जनाएको छ।

आईएमई खल्तीका प्रमुख कार्यकारी अधिकृत प्रवीण रेग्मीले इन्फ्लुएन्सरलाई अब केवल पहुँच नभई जिम्मेवारीका रूपमा हेर्नुपर्ने बताउँदै यो अवार्डले क्रिएटरहरूलाई आफ्नो आवाजलाई प्रभावकारी रूपमा प्रयोग गर्ने मञ्च दिने उल्लेख गरेका छन्।

खल्ती एपमार्फत इच्छुक क्रिएटरहरूले आवेदन दिन सक्ने कम्पनीले जनाएको छ।