काठमाडौं। OPPO Nepal ले नेपाली बजारमा नयाँ स्मार्टफोन ‘ओपो ए६सी’ सार्वजनिक गरेको छ। कम्पनीले प्रिमियम डिजाइन, शक्तिशाली ७००० एमएएच ब्याट्री, एआई फिचर तथा टिकाउपनासहित यो स्मार्टफोन सार्वजनिक गरेको जनाएको छ।

ओपो ए६सीमा ७००० एमएएच क्षमताको ब्याट्री प्रयोग गरिएको छ, जसले लामो समयसम्म गेम खेल्न, भिडियो हेर्न तथा इन्टरनेट प्रयोग गर्न सहज बनाउने कम्पनीको दाबी छ। साथै, फोनमा रिभर्स वायर्ड चार्जिङ सुविधा पनि उपलब्ध छ। कम्पनीका अनुसार, यसमा प्रयोग गरिएको ब्याट्रीले ६ वर्षसम्म टिकाउ प्रदर्शन दिने क्षमता राख्छ।

फोनलाई प्रिमियम लुक दिन फ्ल्यागशिप स्मार्टफोनबाट प्रेरित डिजाइन प्रयोग गरिएको छ। यो ‘फेदर ह्वाइट’ र ‘स्टोन ब्राउन’ दुई रंगमा उपलब्ध हुनेछ। १२० हर्ज अल्ट्रा ब्राइट डिस्प्लेले स्मूथ स्क्रोलिङ र उत्कृष्ट दृश्य अनुभव प्रदान गर्ने कम्पनीले जनाएको छ।

फोटोग्राफी अनुभवलाई अझ स्मार्ट बनाउन फोनमा एआई इरेजर र एआई क्लियर फेस जस्ता आधुनिक एआई फिचर समावेश गरिएको छ। यी सुविधामार्फत प्रयोगकर्ताले तस्बिरबाट अनावश्यक वस्तु हटाउन तथा अनुहारलाई अझ स्पष्ट बनाउन सक्नेछन्।

ओपो ए६सीमा आईपी६४ स्तरको पानी तथा धुलो प्रतिरोधी सुविधा दिइएको छ। साथै, ४८ महिनासम्म फोनको कार्यसम्पादन स्थिर राख्न फ्लुएन्सी प्रोटेक्सन सुविधा पनि उपलब्ध रहेको कम्पनीले जनाएको छ।

ग्राहकलाई थप भरोसा दिलाउन ओपोले ओपो ए६सी खरिदमा विशेष २ महिनाको रिप्लेसमेन्ट ग्यारेन्टी योजना पनि ल्याएको छ। यो अफर जेठ १ देखि असार १, २०८३ सम्म लागू हुनेछ। योजनाअन्तर्गत योग्य ग्राहकहरूले १ महिनासम्म इन्स्ट्यान्ट रिप्लेसमेन्ट सुविधा पाउनेछन् भने सेवा अवधि असार ३१, २०८३ सम्म कायम रहने कम्पनीले जनाएको छ।

कम्पनीका अनुसार, तोकिएको अवधिभित्र देखिएका योग्य हार्डवेयर समस्यामा मात्र यो सुविधा लागू हुनेछ। सामान्य मर्मत सेवाको सट्टा योग्य ग्राहकलाई नयाँ रिप्लेसमेन्ट डिभाइस उपलब्ध गराइनेछ।

ओपो ए६सीको ४ जीबी र्याम र ६४ जीबी स्टोरेज भेरियन्ट नेपालभरका आधिकारिक ओपो रिटेल स्टोरमा २० हजार ९९९ रुपैयाँ प्रारम्भिक मूल्यमा उपलब्ध भएको कम्पनीले जनाएको छ।

यसैबीच, OPPO A6 भेरियन्ट पनि नेपाली बजारमा सार्वजनिक गरिएको छ। ‘स्याफायर ब्लु’ र ‘अरोरा गोल्ड’ रंगमा उपलब्ध यो स्मार्टफोनको मूल्य ४० हजार ९९९ रुपैयाँ तोकिएको छ। कम्पनीका अनुसार, यो भेरियन्ट धेरै स्टोरेज, सहज मल्टिटास्किङ तथा प्रिमियम स्मार्टफोन अनुभव खोज्ने प्रयोगकर्तालाई लक्षित गरिएको हो।