काठमाडौं । माछापुच्छ्रे बैंक लिमिटेडले आफ्नो उच्च व्यवस्थापन टोलीलाई थप सुदृढ बनाउने उद्देश्यले दुई वरिष्ठ अधिकारीलाई पदोन्नति गरेको छ।

बैंक सञ्चालक समितिको साउन ४ गते बसेको बैठकले नायब प्रमुख कार्यकारी अधिकृत (डीसीईओ) प्रसिद्धराज अर्याललाई वरिष्ठ नायब प्रमुख कार्यकारी अधिकृत (सिनियर डीसीईओ) तथा नायब महाप्रबन्धक सुभाष जमरकटेललाई नायब प्रमुख कार्यकारी अधिकारी (डीसीईओ) पदमा नियुक्त गर्ने निर्णय गरेको हो।

दुई दशकभन्दा बढी बैंकिङ अनुभव भएका अर्यालले काठमाडौं विश्वविद्यालयबाट एमबीए गरेका छन्। उनले कर्जा, ट्रेजरी, करेस्पोन्डेन्ट बैंकिङ, शाखा सञ्चालन तथा लघुवित्तलगायत विभिन्न क्षेत्रमा नेतृत्वदायी भूमिका निर्वाह गरेका छन्। यसअघि उनी सिभिल बैंक, सनराइज बैंक र नेपाल इन्भेष्टमेन्ट बैंकमा विभिन्न जिम्मेवारीमा कार्यरत थिए।

त्यसैगरी, चार्टर्ड एकाउन्टेन्ट सुभाष जमरकटेलले इन्स्टिच्युट अफ चार्टर्ड एकाउन्टेन्ट्स अफ इन्डियाबाट सीए, त्रिभुवन विश्वविद्यालयबाट व्यवस्थापन र कानुनमा स्नातक तथा थाइल्यान्डस्थित एसियन इन्स्टिच्युट अफ टेक्नोलोजी (एआईटी) बाट बैंकिङ तथा फाइनान्समा प्रोफेसनल मास्टर्स डिग्री हासिल गरेका छन्।

बैंकका अनुसार अर्याल र जमरकटेल दुवैले आफ्नो बैंकिङ यात्रामा उल्लेखनीय व्यावसायिक सफलता हासिल गर्दै नेपाली वित्तीय क्षेत्रमा सक्षम, अनुभवी र सफल बैंकरका रूपमा पहिचान स्थापित गरेका छन्। बैंकले उनीहरूको नेतृत्वबाट संस्थागत क्षमता, सेवा गुणस्तर तथा व्यवसाय विस्तारमा थप सकारात्मक योगदान पुग्ने विश्वास व्यक्त गरेको छ।