ललितपुर । Glocal Pvt. Ltd. को आयोजनामा ‘स्टडी इन नेपाल तथा अन्तरदेशीय शिक्षा फोरम २०२६’ सम्पन्न भएको छ। ललितपुरस्थित Hotel Himalaya मा आयोजित कार्यक्रममा शिक्षा क्षेत्रका विज्ञ, कूटनीतिज्ञ, उद्योगी तथा नीति निर्माताहरूले नेपालको उच्च शिक्षालाई विश्वस्तरीय बनाउने विषयमा छलफल गरेका छन्।

फोरममा नेपालको उच्च शिक्षा प्रणाली सुधार, अन्तरदेशीय शिक्षाको विस्तार तथा स्नातकहरूको रोजगारी क्षमता अभिवृद्धि गर्ने विषयमा विशेष जोड दिइएको थियो।

कार्यक्रमको सुरुवातमा Times Higher Education का एशले मोकले विश्व शिक्षा प्रवृत्ति र दक्षिण एसियामा नेपालको सम्भावनाबारे प्रस्तुति दिएका थिए। त्यसपछि Kathmandu University का उपकुलपति प्रा. डा. ऋषिकेश वाग्ले तथा अर्थशास्त्री प्रा. डा. अच्युतप्रसाद वाग्लेले नेपालको शिक्षा प्रणाली सुधारका विषयमा धारणा राखेका थिए।

शिक्षा, विज्ञान तथा प्रविधि मन्त्रालयका उपसचिव परशुराम तिवारीले नेपालमा अन्तरदेशीय शिक्षाको स्वीकार्यता बढ्दै गएको उल्लेख गर्दै सरकारले यस क्षेत्रलाई प्रवर्द्धन गर्न सहयोग गरिरहेको बताए।

कार्यक्रमअन्तर्गत भएको पहिलो प्यानल छलफलमा नेपाललाई क्षेत्रीय शैक्षिक केन्द्रका रूपमा विकास गर्ने विषयमा बहस गरिएको थियो। छलफलमा Rob Fenn, Greg Clem, Shailaja Adhikari तथा Tribhuvan University का रजिस्ट्रार प्रा. डा. महानन्द चालिसे सहभागी थिए।

दोस्रो प्यानल छलफल ‘शिक्षाको गुणस्तर र रोजगारी’ मा शिक्षा र उद्योगबीचको दूरी कम गर्ने विषयमा केन्द्रित थियो। कार्यक्रममा सहभागीहरूले ज्ञान, दृष्टिकोण, सीप र बानीमा आधारित शिक्षाले मात्र विद्यार्थीहरूलाई रोजगारीयोग्य बनाउन सक्ने निष्कर्ष निकाले।

यस सत्रमा UNESCO का प्रतिनिधि जाको डु टोइट, Confederation of Nepalese Industries का अध्यक्ष वीरेन्द्रराज पाण्डे, Nabil Bank का प्रमुख कार्यकारी अधिकृत मनोज ज्ञवाली तथा Kathmandu University School of Management की निमित्त डिन डा. रोशी लामिछाने सहभागी थिए।

कार्यक्रम उद्घाटन गर्दै ग्लोकलका अध्यक्ष आशिष ठाकुरले नेपालले श्रम र पर्यटनसँगै ज्ञान, अनुसन्धान र नवप्रवर्तनमा आधारित अर्थतन्त्र निर्माण गर्नुपर्ने बताए। उनले स्वदेशमै गुणस्तरीय शिक्षा विकास गर्न सके विद्यार्थी विदेशिने क्रम घटाउन सकिने उल्लेख गरे।

फोरमको समापनमा Kajol Jha ले ‘संयुक्त नेतृत्व समिति’ गठन गरिएको घोषणा गर्दै यसले शैक्षिक नीतिगत सुधार र अन्तर्राष्ट्रिय सहकार्यलाई अघि बढाउने बताइन्।