काठमाडौं । नेपालको पहिलो बैंक नेपाल बैंक लिमिटेडमा खाता रहेका ग्राहकहरू, बैंकमा कार्यरत कर्मचारीहरू तथा कर्मचारीका परिवारका सदस्यहरूलाई सिद्धार्थ बिजनेस ग्रुप अफ हस्पिटालिटी प्रालिअन्तर्गतका होटल, रिसोर्ट, रेस्टुरेन्ट तथा क्याफेहरूमा विशेष छुट प्रदान गर्ने सम्झौता भएको छ। यस सम्झौता बमोजिम नेपाल बैंकका ग्राहक, कर्मचारी र उनीहरूका परिवारले देशका सातै प्रदेशमा सञ्चालित सिद्धार्थ बिजनेस ग्रुपका २५ वटा होटल, रिसोर्ट, रेस्टुरेन्ट तथा क्याफेहरूले प्रदान गर्ने विभिन्न सेवाहरूमा बिल रकमको १० प्रतिशतदेखि २५ प्रतिशतसम्म छुट प्राप्त गर्न सक्नेछन्। उक्त सम्झौतापत्रमा नेपाल बैंक लिमिटेडका तर्फबाट सहायक प्रमुख कार्यकारी अधिकृत दीपेन्द्र राज काफ्ले र सिद्धार्थ बिजनेस ग्रुप अफ हस्पिटालिटीका तर्फबाट व्यवसाय प्रबन्ध निर्देशक दुर्गा दत्त पन्तले हस्ताक्षर गर्नुभएको छ।

हाल नेपाल बैंकले देशभर रहेका आफ्ना २३१ शाखाहरू, २४६ एटीएमहरू तथा ६१ वटा एक्सटेन्सन काउन्टरहरू मार्फत करिब २७ लाख ग्राहकहरूलाई वित्तीय सेवा पुर्‍याउँदै आएको छ। बैंकले ग्राहक सेवामा व्यापक सुधार गरी आधुनिक बैंकिङ प्रविधिमार्फत प्रतिस्पर्धी रूपमा सेवा प्रदान गर्दै अगाडि बढिरहेको छ। छिटोछरितो र गुणस्तरीय ग्राहक सेवामा जोड दिँदै युवा जनशक्तिमार्फत देशभर बैंकिङ सेवा प्रदान गरिरहेको यस बैंकमा कुशल व्यवस्थापन, युवा कर्मचारी र आधुनिक प्रविधिको समुचित प्रयोग भएसँगै आम नेपालीमाझ नेपालको पहिलो बैंक नेपाल बैंकप्रतिको आकर्षण दिनप्रतिदिन बढ्दै गएको छ।