काठमाडौं । साङ्ग्रिला डेभलपमेन्ट बैंक लिमिटेडले आफ्नो संस्थागत सामाजिक उत्तरदायित्व अन्तर्गत दार्चुलामा दुई दिने नि:शुल्क आँखा परीक्षण तथा उपचार शिविर सम्पन्न गरेको छ। बैंकले जिल्ला अस्पताल खलङ्गा र दुहुँ गाउँपालिकामा यो शिविर सञ्चालन गरेको हो। जिल्ला अस्पताल खलङ्गामा आयोजित शिविरमा ३८७ जना र दुहुँ गाउँपालिकामा ३२४ जना गरी कुल ७११ जनाले सेवा लिएका छन्। शिविरमा सहभागीहरूलाई विशेषज्ञ डाक्टरहरूबाट नि:शुल्क आँखा परीक्षण र परामर्शका साथै आवश्यक औषधि र चस्मा समेत वितरण गरिएको थियो।

गेटा आँखा अस्पताल धनगढीका नेत्र चिकित्सकसहितको टोलीले प्राविधिक सेवा प्रदान गरेको यस शिविरमा परीक्षण गरिएका बिरामीमध्ये मोतियाबिन्दुको शल्यक्रिया गर्नुपर्ने अवस्था भएका व्यक्तिहरूको शल्यक्रिया खर्च साङ्ग्रिला डेभलपमेन्ट बैंकले नै बेहोर्ने व्यवस्था मिलाएको छ। शिविरमा स्थानीय सर्वसाधारणका साथै जनप्रतिनिधि तथा सरोकारवाला निकायका प्रतिनिधिहरूको बाक्लो उपस्थिति रहेको थियो।

आम नागरिकको प्रगाढ विश्वास र भरोसाका कारण साङ्ग्रिला डेभलपमेन्ट बैंकले हाल मुलुकभर १०९ शाखा कार्यालय र ३० वटा एटीएम मार्फत बैंकिङ सेवा प्रवाह गर्दै आएको छ। संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई पालना गर्दै आएको यस बैंकले आगामी दिनमा आफ्नो सेवालाई अझ विस्तार गर्दै लैजाने प्रतिबद्धता समेत व्यक्त गरेको छ। बैंकका वरिष्ठ नायब महाप्रबन्धक अपूर्वप्रसाद जोशीले यस सेवामूलक कार्यमा सहयोग गर्ने सबैलाई धन्यवाद ज्ञापन गर्नुभएको छ।