काठमाडौँ । नेपालका सीमित सवारीसाधन आयातकर्ता र व्यवसायीहरूको सानो संगठनबाट सुरु भएको नाडा अटोमोबाइल्स एसोसिएसन अफ नेपालको यात्रा आज पाँच दशकको ऐतिहासिक उचाइमा पुगेको छ। सन् १९७५ मा स्थापित नाडाले आफ्नो ५० वर्षे यात्रालाई स्वर्ण जयन्तीका रूपमा मनाउँदै ‘एचपी ल्युब्रिकेन्ट्स प्रिजेन्ट्स १८औँ नाडा अटो शो २०२६’ आयोजना गर्ने भएको छ।

आगामी भदौ ९ देखि १४ गतेसम्म अर्थात् अगस्ट २५ देखि ३० तारिखसम्म काठमाडौँको भृकुटीमण्डप प्रदर्शनी हलमा आयोजना हुने अटो शो यसपटक केवल नयाँ सवारीसाधन प्रदर्शनको मेला मात्र नभई नेपालको अटोमोबाइल क्षेत्रले पाँच दशकमा गरेको यात्राको उत्सवका रूपमा समेत रहने नाडाले जनाएको छ।

करिब तीन लाख वर्गफिट क्षेत्रफलमा फैलिने प्रदर्शनीमा दुई सयभन्दा बढी स्टल रहनेछन्। मेलामा २३ वटा यात्रुवाहक चारपाङ्ग्रे ब्रान्ड, १७ वटा साना तथा मझौला व्यावसायिक सवारी (एलसीभी) ब्रान्ड तथा १३ वटा दुईपाङ्ग्रे ब्रान्डको प्रत्यक्ष सहभागिता रहनेछ।

त्यसैगरी अटो पार्ट्स, टायर, ब्याट्री, ल्युब्रिकेन्ट, चार्जिङ पूर्वाधार तथा ग्यारेज उपकरणसँग सम्बन्धित करिब ७० वटा कम्पनी सहभागी हुनेछन्। अटोमोबाइल बजारको वित्तीय पक्षलाई समेत जोड्दै १० वटा बैंक, वित्तीय संस्था तथा बीमा कम्पनीले पनि प्रदर्शनीमा सहभागिता जनाउने भएका छन्।

५० वर्षमा ५५ लाख सवारीसाधनसम्मको यात्रा

नाडाको पाँच दशक लामो यात्रासँगै नेपालको अटोमोबाइल क्षेत्रले पनि उल्लेखनीय विस्तार गरेको छ। सीमित आयात र बिक्रीमा केन्द्रित रहेको बजार अहिले देशको अर्थतन्त्र, रोजगारी, राजस्व र यातायात प्रणालीसँग प्रत्यक्ष जोडिएको ठूलो उद्योगका रूपमा स्थापित भएको छ।

हाल नेपालमा करिब ५५ लाख सवारीसाधन दर्ता भइसकेका छन्। पछिल्ला पाँच आर्थिक वर्षमा मात्रै नेपालले करिब ४७० अर्ब रुपैयाँ बराबरका सवारीसाधन तथा सम्बन्धित सामग्री आयात गरेको तथ्यांक छ। यस अवधिमा राज्यले करिब ३५१ अर्ब रुपैयाँ भन्सार राजस्व प्राप्त गरेको छ।

यसले अटोमोबाइल क्षेत्र केवल आयात र व्यापारको विषयमा सीमित नभई राष्ट्रिय राजस्व संकलनको महत्वपूर्ण आधार बन्दै गएको देखाउँछ।

हरित गतिशीलतामा तीव्र मोड

नेपालको अटोमोबाइल बजार पछिल्ला वर्षहरूमा विद्युतीय सवारीसाधनतर्फ तीव्र रूपमा मोडिएको छ। हरित गतिशीलताको अवधारणासँगै देशमा हालसम्म करिब ६३ हजार विद्युतीय सवारीसाधन भित्रिइसकेका छन्।

विद्युतीय सवारीको बढ्दो प्रयोगलाई सहज बनाउन चार्जिङ पूर्वाधारको विस्तार पनि भइरहेको छ। देशभर करिब २ हजार चार्जिङ स्टेसनको सञ्जाल तयार भइसकेको छ।

यसपटकको नाडा अटो शोमा पनि विद्युतीय सवारी, चार्जिङ समाधान, नयाँ प्रविधि र दिगो मोबिलिटीका विषय प्रमुख आकर्षणका रूपमा रहने अपेक्षा गरिएको छ।

‘कति बिक्री गर्‍यो’ भन्दा ‘कति धानिरहेको छ’ महत्वपूर्ण

नाडाका अध्यक्ष सुरेन्द्रकुमार उप्रेती का अनुसार स्वर्ण जयन्ती संस्करण केवल संस्थाको वार्षिकोत्सव नभई सिङ्गो अटोमोबाइल उद्योगले देशको अर्थतन्त्रमा पुर्‍याएको योगदानको समीक्षा गर्ने अवसर पनि हो।

उहाँले भन्नुभयो, “पचास वर्ष भनेको कुनै उद्योगलाई ‘कति बिक्री गर्‍यो’ भन्ने आधारमा होइन, ‘कति धानिरहेको छ’ भन्ने आधारमा नाप्न थाल्न पर्याप्त समय हो। भदौ ९ गते हामीले खोल्न लागेको प्रदर्शनी त्यही हो।”

अध्यक्ष उप्रेतीको भनाइले अटोमोबाइल क्षेत्रको बदलिँदो भूमिकालाई समेत संकेत गर्छ। सवारी बिक्रीसँगै यस क्षेत्रले रोजगारी, मर्मत तथा सेवा व्यवसाय, स्पेयर पार्ट्स, वित्तीय सेवा, बीमा, इन्धन तथा ऊर्जा पूर्वाधारदेखि राज्यको राजस्वसम्म व्यापक आर्थिक चक्र निर्माण गरिरहेको छ।

अटो शोबाट नयाँ यात्राको सन्देश

नाडाले विगत पाँच दशकदेखि नेपालको अटोमोबाइल क्षेत्रलाई व्यवस्थित र विस्तार गर्न नेतृत्वदायी भूमिका खेल्दै आएको छ। अबको यात्रा भने परम्परागत सवारी बजारभन्दा पनि प्रविधि, विद्युतीकरण, सुरक्षा र वातावरणमैत्री यातायाततर्फ केन्द्रित हुने देखिन्छ।

स्वर्ण जयन्ती संस्करणको ‘१८औँ नाडा अटो शो २०२६’ ले नेपालको अटोमोबाइल क्षेत्रले तय गरेको विगतको यात्रालाई स्मरण गर्दै भविष्यको मोबिलिटीबारे नयाँ बहस र सम्भावनाको ढोका खोल्ने अपेक्षा गरिएको छ।

भदौ ९ देखि १४ गतेसम्म भृकुटीमण्डपमा आयोजना हुने यो प्रदर्शनी नेपाली अटोमोबाइल उद्योगको ५० वर्षे इतिहास मात्र होइन, आगामी दशकको गतिशीलता कस्तो हुने भन्ने संकेत गर्ने महत्वपूर्ण मञ्च बन्ने अपेक्षा गरिएको छ।