काठमाडौँ, ७६ पुस २५ । नेपाल टेलिकम र सडक विभागबीच सडक र दूरसञ्चार पूर्वाधार निर्माणको क्रममा सहकार्य गरी अगाडि बढ्ने समझदारी भएको छ । 

सो समझदारी पत्रमा विभागका महानिर्देशक केशव कुमार शर्मा र टेलिकमका प्रबन्ध निर्देशक डिल्लीराम अधिकारीले हस्ताक्षर गर्नुभयो । 

समझदारी अनुसार विभागबाट सडक निर्माण तथा स्तरोन्नति गर्ने क्रममा टेलिकमको अप्टिकल फाइबर नेटवर्क विस्तार गर्न आवश्यक पाईप डक्ट बिछ्याइने छ । 

यस्ता डक्ट बिछ्याउनका लागि आवश्यक पर्ने रकम सम्बन्धित आयोजनाको विस्तृत योजना र अनुमानित लागत अनुसार गरिने शिल कोटेशन वा बोलपत्र बमोजिम निक्र्यौल भएको रेट बमोजिम टेलिकमले सडक विभागलाई भुक्तानी गर्ने टेलिकमकी प्रवक्ता प्रतिभा बैद्यले बताउनुभयो । 

सडक विभागले मुलुकभर सडक निर्माण तथा विस्तारको कार्य अगाडि बढाइरहेको र टेलिकमले सञ्चार सेवा मुलुकको अति विकट स्थानसम्म पुर्‍याइरहेको अवस्थामा टेलिकम र विभागबीच समन्वय र सहकार्य आवश्यक देखिएको प्रवक्ता बैद्यको भनाई थियो ।   

यसअघि सडक निर्माण, विस्तार, मर्मत सम्भार र सडक चौडा गर्ने तथा दूरसञ्चार पूर्वाधार निर्माण र सुधारका क्रममा दुबै निकायबाट निर्मित पूर्वाधारका संरचनामा हानी–नोक्सानी हुनुका साथै निर्माण कार्यमा दोहोरो लगानी हुने र सेवाको गुणस्तरमा समेत प्रतिकूल प्रभाव पर्दै आएको थियो ।