काठमाडौं । सरकारले विदेशमा रहेका नेपालीको उद्धारमा पहल गर्न थालेपछि विभिन्न तीन एयरलाइन्सबाट ४३७ जना यात्रु नेपाल आएका छन् । त्यसैगरी नेपालबाट ४ बच्चासहित २०३ जना यात्रु बाहिरिएका छन् ।

त्रिभुवन विमानस्थल कार्यालयका अनुसार आज नेपाल एयरलाइन्सको वाइडबडी जहाजले साउदीको रियादबाट २६३ यात्रु बोकेर काठमाडौं आएको छ भने हिमालय एयरलाइन्सले साउदीको दमामबाट १५४ जना यात्रुलाई काठमाडौं ल्याएको छ ।

यी जहाजमा दमामबाट २ र रियादबाट ४ वटा शव गरी कुल ६ वटा शवसमेत ल्याइएको छ । लकडाउनपछि विदेशमा निधन भएका व्यक्तिहरुको शव उतै रोकिएका थिए ।

आजै टर्कीको इस्तानबुलबाट टर्कीस एयरले २० जनालाई काठमाडौं ल्याएको छ । सो जहाज काठमाडौंबाट ४ बच्चासहित २०३ जना यात्रु लिएर उडेको थियो ।

सरकारले दैनिक ५ सय जना यात्रुलाई काठमाडौं ल्याउने गरी पाँचौ चरणमा एयरलाइन्सहरुलाई उडान अनुमति दिएको छ । आजै नेपाल एयरलाइन्स र हिमालय एयरलाइन्सका एक एक जहाज क्वालालाम्पुर पुग्दैछन् । हिमालयको अर्को जहाज भने चीनको चोङछिङ जाँदैछ । यी जहाज शुक्रबार फर्कनेछन् । शुक्रबार दोहाबाट कतार एयरवेज पनि काठमाडौं आउँदैछ ।