काठमाडौं । पछिल्लो समय सेयर बजारले दिनदिनै नयाँ रेकर्ड बनाउन थालेको छ । आइतबार मात्र नयाँ रेकर्ड कायम गरेको नेप्सेले आज एकैदिन ३ वटा नयाँ रेकर्ड बनाएको छ ।

गतवर्ष कोरोना कालदेखि उकालो लागेको बजार त्यसयता निरन्तर बढिरहेको छ । करिब १ वर्षको अवधिमा नेप्से झन्डै साढे दुई गुणाले बढेको छ ।

कोरोनाका कारण देशको अर्थतन्त्र ठप्पप्रायः हुँदा अन्य क्षेत्रमा लगानी हुन नसक्दा लगानीकर्ता सेयर बजारमा होमिँदा बजारले दिनदिनै नयाँ रेकर्ड बनाउँदै गएको जानकारहरु बताउँछन् ।

रेकर्ड नं. १ नेप्से इतिहासकै उच्च बिन्दुमा : नेप्सले २८२३ विन्दुको उचाइ चुम्दै नयाँ रेकर्ड बनाएको हो । यसअघि आइतबार नेप्सेले इतिहासकै सर्वाधिक २८२० विन्दुको रेकर्ड बनाएको थियो ।

रेकर्ड नं. २ एकैदिन सर्वाधिक कारोबार : नेप्सेले सूचकमा नयाँ रेकर्ड बनाएको दिन कारोबार रकममा पनि नयाँ रेकर्ड बनाएको छ । एकै दिन झन्डै १३ अर्ब १७ करोडको कारोबार हुँदै नयाँ कीर्तिमान बनाएको हो । यसअघि गत जेठ ५ गते हालसम्मकै सर्वाधिक ११ अर्ब ९५ करोडको कारोबार भएको थियो ।

रेकर्ड नं. ३ सर्वाधिक कित्ता सेयर कारोबार : सूचक र कारोबार रकम रेकर्ड कायम गरेको दिन सेयर सर्वाधिक कित्ता सेयर कारोबारको रेकर्ड पनि बनेको छ । आज एकै दिन २ करोड ७१ लाख बढी कित्तासेयर कारोबार भएको छ । यो हालसम्मकै सर्वाधिक हो । यसअघि गत जेठ ५ हालसम्मकै सर्वाधिक २ करोड ५१ लाख बढी कित्ता सेयर किनबेच भएको थियो ।

यस्तै, बजारले रेकर्डैरेकर्ड बनाएको दिन सूचीकृत कम्पनीहरुको बजार पूँजीकरण ३९ अर्ब १७ अर्ब रुपैयाँ पुगेको छ । यो देशको कुल जीडीपीभन्दा पनि बढी हो ।

आज सेयर बजार मापक सूचक नेप्से ३.०५ अंकले बढेर २८२३.०५ विन्दुमा पुगेको छ । नेपाल स्टक एक्सचेन्जका अनुसार आज २१६ कम्पनीको १३ अर्ब १७ करोड ५३ लाख ५३ हजार १८८ रुपैयाँ बराबरको २ करोड ७१ लाख ४० हजार २०२ कित्ता सेयर किनबेच भएका छन् ।

आज कारोबारमा आएका १३ वटा समूहमध्ये ५ समूहको परिसूचकमा हरियालीे छाएको छ भने ८ समूहको परिसूचक राताम्मे बनेका छन् । निर्जीवन बीमा समूहको परिसूचक सबैभन्दा धेरै १९६.६४ अंकले बढेको छ भने व्यापार समूह ५७.६ अंकले घटेको छ ।

आज कारोबारमा आएका २१६ कम्पनीमध्ये ९० कम्पनीको सेयर मूल्य बढेको छ भने ११० कम्पनीको मूल्यमा गिरावट आएको छ । १६ कम्पनीको मूल्य स्थिर रहेको छ ।

आज एचआइडीसीएलको सर्वाधिक कारोबार भएको छ । यसको १ अर्ब २६ करोड रुपैयाँ बढीको कारोबार भएको छ । यससँगै एचआइडीसीएल एकैदिन १ अर्ब बढी कारोबार हुने तेस्रो कम्पनी बनेको छ । यसअघि नेपाल लाइफ इन्स्योरेन्स र नेपाल इन्फ्रास्ट्रक्चर बैंकको एकैदिन १ अर्ब बढीको कारोबार भएको थियो ।

कारोबार रकमकै आधारमा नेको इन्स्योरेन्स ३७ करोड र नेपाल पुनर्बीमा कम्पनीको २८ करोडको कारोबार सहित शीर्ष तीनमा रहे ।

झिनो अंकले बढेको बजारमा ३ कम्पनीको मूल्यमा पोजेटिभ सर्किट लागेको छ । वरुण हाइड्रोपावर, युनाइटेड इदीमार्दी र माउन्टेन हाइड्रोका सेयरधनीले करिब १० प्रतिशत कमाएका छन् । ग्रीन डेभलपमेन्ट बैंकको पनि सेयर मूल्य ९ प्रतिशत धेरैले बढेको छ ।