नुवाकोटमा बस दुर्घटना हुँदा २ जनाको मृत्यु भएको छ । करीब ३० जना घाइते भएका छन् ।

नुवाकोटकै खरानीटारबाट काठमाडौं आउँदै गरेको बा१ख ६३५६ नम्बरको बस सूर्यगढी गाउँपालिका वडा नम्बर ५ फेदीखोलामा दुर्घटनामा परेको नुवाकोट प्रहरी प्रमुख एसपी वसन्त कुंवरले जानकारी दिए । दुर्घटनाको कारण खुल्न सकेको छैन ।

 

इलाका प्रहरी कार्यालय खरानीटारका प्रहरी निरीक्षक नरेश महतोका अनुसार घटनामा अरु ४५ जना यात्रु घाइते भएका छन् ।

घाइतेहरुमध्ये १० जनालाई उपचारका लागि काठमाडौँ लगिएको छ भने अन्यको नुवाकोटमै उपचार भइरहेको छ । साँघुरो सडकमा क्षमता भन्दा बढी यात्रु बोकेका कारण दुर्घटना भएको अनुमान प्रहरीले गरेको छ ।

 

घटनास्थलमा खटिएका नेपाल प्रहरीका सई पूर्णबहादुर लामाले दुर्घटनाको पुष्टि गर्दै २ जनाको मृत्यु भएको र ३० भन्दा बढी घाइते भएको जानकारी दिए । पञ्चकन्या गाउँपालिका खप्रेसकी ३२ वर्षीय मीनु तामाङ र चितवनको मुग्लिङका ५७ वर्षीय बलराम तिवारीको मृत्यु भएको छ ।

 

सई थापाले उद्धार कार्य जारी रहेकाले हताहतीबारे यकिन गरेर भन्न नसकिने बताए । ‘अहिले घाइतेहरुको उद्धार गरेर अस्पतालतर्फ पठाइरहेका छौं । हताहतीको यकिन विवरण अझै आइसकेको छैन’, थापाले भने ।

 

बसमा सवार अधिकांश यात्रु दशैं किनमेलका लागि सदरमुकाम आएको बताइए पनि बसमा कति यात्रु थिए भन्ने खुलेको छैन । घटनास्थल फेदीखोला जिल्ला सदरमुकाम विदुरबाट झण्डै १२ किलोमिटरको दूरीमा पर्छ ।