(राजेन्द्र तामाङ)

काभ्रे । काभ्रेको नमोबुद्ध नगरपालिका वडा नं ११, कुरगाउँमा विभिन्न पार्टी परित्याग गरी २ सय ५० जना भन्दा बढीले नेपाली कांग्रेसमा प्रेवेश गरेको छ । नव प्रवेशीहरुले नेपाली कांग्रेसको सदस्यता लिएका छन् ।

वडा सभापति शंकरदेव भट्टराईले दिएको जानकारी अनुसार सोमबार आयोजित वडा पार्टी कार्यालय उद्धघाटन कार्यक्रममा एमाले, माओवादी, नेकपा (एस) लगायतका विभिन्न पार्टी परित्याग गरी ठूलो संख्यामा कांग्रेस प्रवेश गरेका हुन ।

कांग्रेस केन्द्रीय सदस्य गणेश लामा, जिल्ला सभापति तिर्थ लामा, प्रतिनिधीसभा क्षेत्र नं १ का सभापति दिनेश लामा, नमोबुद्ध नगर सभापति कुन्साङ लामा, महासमिति सदस्य समेत रहेका भुम्लु गाउँपालिका सभापति दावा लामा, महासमिति सदस्य रोशन लामा लगायतका नेताहरुले कांग्रेसमा स्वागत गरेका थिए ।

कार्यक्रममा सो वडाको प्रतिनिधीत्व गर्दै १४ औं महाधिवेशनमा महासमिति सदस्य निर्वाचित रोशन लामालाई सम्मान समेत गरिएको थियो । नमोबुद्ध–११ वाट क्षेत्रीय प्रतिनिधी निर्वाचित लामा महाधिवेशन प्रतिनिधी हुँदै सर्वसम्मत रुपमा महासमिति सदस्य भएका थिए ।

कार्यक्रममा बोल्ने सम्पूर्ण वक्ताहरुले वैशाख ३० गते तोकिएको स्थानीय तहको निर्वाचनमा कांग्रेसलाई विजयी गराउन सबैले आफ्नो तहबाट काम गर्नुपर्ने बताए ।