काठमाडौ । प्रधानमन्त्रीको सरकारी आवास बालुवाटारमा अत्याधुनिक प्रविधि सहितको सचिवालय निर्माण सुरु भएको छ।

विशेष भवन निर्माण तथा संभार डिभिजनका लागि अर्थ मन्त्रालयले कार्तिकमा साढे २ करोड रकम निकासा गरेपछि बालुवाटारमा ‘हाईटेक’ सचिवालय निर्माण गरिएको हो।

बालुवाटारमै रहेका भवनहरुलाई प्रयोग गरी प्रधानमन्त्रीको सचिवालयलाई अत्याधुनिक बनाउन लागिएको हो।

प्रधानमन्त्री कार्यालयका अनुसार प्रधानमन्त्री केपी शर्मा ओली र उनका सल्लाहकारहरुको सुझाव बमोजिम सुरक्षा र सुविधासहितको अत्याधुनिक प्रबन्ध सहितको सचिवालय बनाईरहेको छ।

सचिवालयमा २ करोड ४२ लाख २५ हजार रुपैयाँ बराबरका सुरक्षा सामाग्री खरिद हुँदैछ। प्रधानमन्त्री ओलीले सुत्ने पलंग सहित अन्य सामग्री प्रयोग गर्ने र ४० लाखको पलंग किन्ने तयारी भएको श्रोतले बतायो।

प्रधानमन्त्री तथा मन्त्रिपरिषद्को कार्यालयका प्रवक्ता सहसचिव बिनोदबहादुर सिँहले बालुवाटारमा केही भौतिक संरचना र सामाग्रीका लागि रकम निकासा भएको बताए। उनले आफूलाई समेत बिस्तृतमा खरिद हुने सामाग्रीका बिषयमा जानकारी नभएको बताए।

सरकारी र विशेष आवास तथा कार्यालय निर्माण गर्ने विभागले बालुवाटारमा निजी निवास, विशेष भेटघाट, कार्यालय र समूहगत छलफल तथा मन्त्रिपरिषद् बैठक समेत सञ्चालनका लागि सोही अनुसार भौतिक संरचना निर्माण गरिरहेको हो।

विभागले सुरक्षाका दृष्टिकोणले आधुनिक सुरक्षा ब्यारियरलगायत अन्य उपकरण जडान थालिएको छ।

विभागका प्रमुख रविन्द्र बोहराले प्रधानमन्त्रीको सचिवालय निर्माणका लागि बालुवाटारमा केही काम भइरहेको बताए। उनले रकम निकासाका बिषयमा आफूलाई केही जानकारी नभएको समेत बताए।

‘हामीले केही निर्माण कार्य गरिरहेका छौं, सुरक्षा प्रवन्धका लागि काम भइरहेको हो’ बोहराले भने, ‘रकम निकासाका बिषयमा भने मैलेपनि बुझ्नै पर्छ।’