काठमाडौं । नेपाल बीमा प्राधिकरणबाट लाइसेन्स पाएका चार वटा लघु बीमा कम्पनीहरुले सञ्चालनको तयारी गरिरहेका छन् । लघु बीमा कम्पनीका अध्यक्ष तथा सञ्चालकहरु तथा सिईओहरुले कम्पनी चलाउन नियामक नेपाल बीमा प्राधिकरणमा कार्यरत कर्मचारीहरुलाई दरिलो अफर गर्न थालेका छन् ।

बीमा प्राधिकरणमा कार्यरत क्षमतावान कर्मचारीहरुलाई धमाधम निजि कम्पनीहरुले दरिलो अफर गरेर लैजाने तयारी गर्दा पनि अर्थमन्त्रालय र अध्यक्ष सूर्य प्रसाद सिलवाल भने मौन रहँदै आएका छन् । नैतिकताको आधारमा नियामक निकायमा काम गरेका कर्मचारीहरुलाई निजि कम्पनीमा जागिर खान जान निश्चित समय कुलिङ पिरियड लाग्ने गर्दछ । बीमा प्राधिकरणले कुलिङ पिरियडको सम्बन्धमा कुनै निर्णय गरेको छैन ।

नेपाल राष्ट्र बैंकमा कार्यरत कर्मचारीहरुलाई निजि कम्पनीमा जागिर खान जानको लागि निश्चित समय कुलिङ पिरियड तोकिएको छ । कुलिङ पिरियड नतोकिँदा प्राधिकरणमा कार्यरत रहेको न्यून संख्याका दक्ष जनशक्ति गुमाउने जोखिम बढेको छ । बीमा प्राधिकरण आफै अहिले जनशक्तिको अभाव खेपिरहेको छ । अभावकै कारण बीमा नियमावली समेत राम्रो बनाउन नसकेको गुनासो चौतर्फी रुपमा उठिरहेको छ ।

नियामकको हिसाबले सबै कुरामा दक्ष कर्मचारीले सम्पन्न हुनुपर्नेमा भएका कर्मचारीहरु समेत धमाधम चुहिँदै जाने अवस्था आउँदा समेत प्राधिकरणले कुनै निर्णय नगरेको चर्चा प्राधिकरणभित्रै चलिरहेको छ ।