काठमाडौं । पेट्रोलियम व्यवसायीहरुले, ‘नेपाल पेट्रोलियम डिलर्स एसोसियसन’ले व्यवसायीको हितमा काम गर्न नसकेको आरोप लगाएका छन् ।

आईतबार काठमाडौंमा पत्रकार सम्मेलन गर्दै केही व्यवसायीले, एसोसियसनको विकल्पको रुपमा पेट्रोलियम व्यवसायी संघ स्थापनाको घोषणासहित व्यवसायीको हितमा काम हुन नसकेको दाबी गरेका हुन् ।

पत्रकार सम्मेलनमा संघका कार्यवाहक अध्यक्ष राजेन्द्र गुप्ताले, दैनिक उपभोग्य वस्तुको रुपमा प्रयोग हुँदै आएको पेट्रोलियम पदार्थको कारोवार गर्ने नेपाल पेट्रोलियम डिलर्स राष्ट्रिय एशोसिएशन’बाट व्यवसायीहरुको हकहितमा काम हुन नसकेपछि नयाँ संस्था मार्फत कारोबार शुरु गरिएको जिकिर गरे ।

उनले भने, ‘दैनिक उपभोग्य वस्तुको रुपमा प्रयोग हुँदै आएको पेट्रोलियम पदार्थको कारोवार गर्ने, नेपाल आयल निगमका देशभरका आधिकारीक विक्रेताहरुको छाता संगठन’ नेपाल पेट्रोलियम डिलर्स राष्ट्रिय एशोसिएशनबाट व्यवसायीहरुको हकहितमा काम हुन नसकेपछि हामीले नयाँ संस्था बनायौ ।’

उनले संस्थागत हित, पारदर्शिता, आफ्ना सदस्यहरुको संरक्षण र सम्र्बद्धनमा काम गर्न नसकेपछि संस्थामा विद्रोह हुने भन्दै नेतृत्वले समय सापेक्ष काम नगर्ने र उत्तरदायित्वबाट पन्छिने बाटो खोज्न थालेपनि विकल्प खोजिएको तर्क गरे ।

संघले, वर्षौदेखि एसोसियसनका पदाधिकारीले बीमा कम्पनीको मिलेमतोमा रकम अपचलन गरेको आरोप लगाएको छ । त्यस्तै संघले अब आफूहरुले बीमालगायतका विभिन्न क्षेत्रमा भएका समस्या समाधानका लागि प्रयास गर्ने दाबी गरेको छ ।