९ जेठ, काठमाण्डौँ-   पटक–पटक सूचना टाँसेर स्थगित भएको व्यवस्थापिका–संसद् बैठक सुचारु गर्ने पटक–पटको प्रयास असफल भएपछि भोलि ११ बजेसम्मका लागि संसद् बैठक स्थगित भएको छ ।
सरकारले सोमबार गरेको स्थानीय तह बढाउने निर्णय र प्रधानमन्त्रीको राजीनामाको विषयमा प्रमुख प्रतिपक्षी दल एमालेले असहमति जनाउँदै संसद् चल्न नदिएपछि आज बैठक बस्न नसकेको हो । एमालेलाई सहमतिमा ल्याउन सत्तापक्षीय दल र सभामुख ओनसरी घर्तीले पटकपटक एमाले नेताहरूसँग छलफल गरेकी थिइन् ।
तर, बैठकमा एमाले अध्यक्ष केपी ओलीलगायतका नेताले स्थानीय तहको संख्या बढाउने निर्णय सरकारले फिर्ता लिनुपर्ने र दोस्रो चरणको निर्वाचन सम्पन्न हुनुअघि प्रधानमन्त्रीले राजीनामा दिन नपाउने भन्दै अडान राखेपछि सहमति जुट्न नसकेको कांग्रेस र माओवादीका नेताहरूले बताएका छन् ।
आजको संसद् बैठकमा प्रधानमन्त्री प्रचण्डले विशेष सम्बोधन गर्ने र राजीनामाको घोषणा गर्ने बताइएको छ । तर, एमालेले दोस्रो चरणको स्थानीय तह निर्वाचन सम्पन्न भएपछि मात्र प्रधानमन्त्रीले राजीनामा दिनुपर्ने भन्दै असन्तोष जनाएको छ ।