७ असार, एजेन्सी- गोर्खाल्याण्डको माग गर्दै आएका भारत दार्जिलिङका १० वटा राजनीतिक शक्तिहरु एक भएका छन् । सवै दलहरु एकजुट हुनुको विकल्प नभएको भन्दै १० राजनीतिक शक्तिहरु साझा मुद्दामा एक भएका हुन् ।

गोर्खा जनमुक्ति मोर्चाको आव्हानमा दार्जिलिङमा भएको सर्वदलीय वैठकमा सहभागी दलहरुले मोर्चालाई गोर्खाल्याण्ड टेरीटोरियल एड्मिनिष्ट्रसेन (जीटीए) वोर्ड तत्काल त्यागेर गोर्खाल्याण्ड आन्दोलनमा मात्रै केन्द्रित हुन आह्वान गरेका छन् । मोर्चाले सन् २०११ जुलाई १८ मा जीटीए गठनमा सम्झौता गरेको थियो ।

वैठकले अनिश्चितकालीन हड्ताललाई निरन्तरता दिने निर्णय समेत गरेको छ । राज्य सरकारले दार्जिलिङमा परिचालित सेना, केन्द्रीय रिजर्भ पुलिस फोर्स र अन्य सुरक्षाकर्मी फिर्ता नवोलाएसम्म वन्द जारी राख्ने निर्णय गरेको हो ।

करिव पाँच घण्टा लामो वैठकमा दलहरुले गोर्खाल्याण्ड आन्दोलनलाई सशक्त ढंगले अघि वढाउने उद्देश्यका साथ संयुक्त तिलकचन्द्र रोकाको संयोजकत्वमा ‘संयुक्त संघर्ष समिति’ गठन गरेको छ । समितिले गोर्खाल्याण्ड मुद्धालाई केन्द्रको ध्यानाकर्षण गर्ने गरी भारतका विभिन्न राज्यमा रहेका गोर्खा नेताहरुसंग छलफल गर्ने बताएको छ ।