काठमाडौं,  यसपटकको एसएसपी बढुवाको प्रतिस्पर्धामा ४ जना महिला एसपीहरुको दाबेदारी रहेको छ । एसपीहरु किरण बज्राचार्य, दुर्गा सिंह (चन्द), मीरा चौधरी र किरण राणाबीच चर्को प्रतिस्पर्धा देखिएको छ ।

केन्द्रीय अनुसन्धान ब्युरो (सीआईबी) मा कार्यरत रहँदा मानव बेचबिखनविरुद्ध उत्कृष्ट काम गरेकी बज्राचार्य सन् २०१६ मा ‘टीआईपी रिपोर्ट हिरो’मा छानिएर वर्ष हिरो व्यक्ति घोषित भएकी थिइन् ।

उनलाई तत्कालीन अमेरिकी विदेशमन्त्री जोन केरी र वैदेशिक विभागका अध्यक्षसमेत रहेका सिनेट बोब कोर्करले अवार्ड प्रदान गरेका थिए । बज्राचार्य अहिले २ नम्बर प्रदेश ट्राफिक प्रहरी कार्यालय पथलैयाको प्रमुख छिन् ।

त्यस्तै, बढुवाको प्रतिस्पर्धामा रहेकी एसपी सिंह कञ्चनपुरकी १३ वर्षीय बालिका निर्मला पन्तको हत्या प्रकरणमा अनुसन्धानमा समन्वयकारी भूमिका निर्वाह गर्न हाल कञ्चनपुरमा खटिएकी छिन् ।

यसअगाडि दाङको प्रहरी प्रमुख रहेकी उनी त्यहाँ आपराधिक सञ्जाल निर्मूल पार्न सफल भएकी थिइन् । बाराको प्रहरी प्रमुख रहेकी एसपी चौधरी पनि एसएसपी बढुवामा बलियो दाबेदार हुन् ।

डीएसपी हुँदा काठमाडौंको बालाजु वृत्त, पाल्पाको प्रहरी प्रमुख र एसपी हुँदा मकवानपुरको प्रहरी प्रमुख भएर उनले कार्यसम्पादन गरिसकेकी छिन् ।

बढुवाको प्रतिस्पर्धामा रहेकी एसपीहरु बज्राचार्य, सिंह र चौधरी नेपाल प्रहरीमा अब्बल अधिकृतका रुपमा चिनिन्छन् । उनीहरु तीनैजना व्यावसायिक प्रहरी अधिकृत हुन् ।

एक वर्ष भक्तपुरको प्रहरी प्रमुखको रुपमा काम गरेकी एसपी राणा हाल प्रहरी मुख्यालयको महिला, बालबालिका निर्देशनालयमा कार्यरत छिन् ।

तुलनात्मक रुपमा कार्यसम्पादनमा कमजोर रहँदै आएकी राणा एसएसपीमा बढुवा हुने सम्भावना न्यून रहेको उच्च स्रोतको दाबी छ ।