काठमाडौं । दाङको घोराहीमा आइतबार दिउँसो एउटा डरलाग्दो दुर्घटना भयो । दुईवटा मोटरसाइकल ठोक्कियो । त्यसमध्ये एउटा मोटरसाइकल उछिटि्टएर बाटोमा हिँडिरहेकी तिला परियारलाई लाग्यो । उनी रड बोकेको ट्याक्टरमा ठोक्किन पुगिन् र उनको छातीमा तीनवटा रड छिर्‍यो ।

उनको एउटा घाँटीबाट बाहिर निस्कियो भने दुईवटा रड कुमबाट बाहिर निस्कियो ।

सोच्दा पनि आङ जिरिङ्ग हुने दुर्घटनामा परी घाइते तिला दाङको घोराही उपमहानगरपालिका ३ झिङ्नीकी हुन् । उनी घोराहीमा कपडा सिलाउने पसलमा रहेका श्रीमानका लागि खाना लिएर आएकी थिइन् । श्रीमानलाई खाना दिएर बिग्रेको मोवाइल बनाउन दिएर फर्किँदै गर्दा उनी दुर्घटनामा परेकी हुन् ।

दिउँसो साढे दुई बजेतिर दुर्घटना भएपछि घाइतेलाई दाङकै उपक्षेत्रीय अस्पतालमा उपचारका लागि लगियो । राप्ती उपक्षेत्रीय अस्पतालले भैरहवा मेडिकल कलेजमा रिफर गर्‍यो । त्यसपछि सुरु भयो तिलाको अत्यासलाग्दो उपचार यात्रा ।

छातीमा गोपिएको तीनवटा रड निकाल्न दाङदेखि भैरहवा, काठमाडौंको राष्ट्रिय ट्रमा सेन्टर हुँदै टिचिङसम्म पुर्‍याइयो । उनलाई उपचारका लागि लिएर आएका पत्रकार जनक नेपालीका अनुसार खाल्डाखुल्डी भएको सडकमा रड हल्लिएर ल्याउन निकै समस्या भएको थियो ।

‘लमहीदेखि भालुवाङसम्म ल्याउनै २ घण्टा लाग्यो, रडहरु हल्लिएर झन् समस्या हुने हुनाले विस्तारै ल्याउनुपर्थ्यो’ उनले भने ।

तिलालाई राति साढे १ बजेतिर भैरहवा मेडिकल कलेजमा पुर्‍याइएको थियो । डाक्टरहरुले समस्या हेरे । एउटा रड मुटु नजिक रहेको देखेपछि उपचार गर्न डराए । ‘एउटा रड मुटुमा छ कि भन्ने कुरा गर्नुभयो । यो अपरेशन गर्नका लागि चाहिने मेसिन छैन । हामी गर्न सक्दैनौं भन्नुभयो’ नेपालीले  भने ।

त्यसपछि आफन्तले काठमाडौंतर्फ ल्याए । उनीहरु सोमबार दिउँसो ११ बजे काठमाडौं आइपुगे । ट्रमा सेन्टरमा उपचारका लागि लगियो । त्यहाँ पनि भैरहवामा जस्तै ‘मुटुमा रड भित्र गडेको भए उपचार गर्न कठिन हुन्छ, टिचिङ लैजानुस्’ भने ।

आफन्तले बेहोस अवस्थामा रहेकी तिलालाई दिउँसो साढे २ बजे त्रिवि शिक्षण अस्पताल पुर्‍याए ।

त्यहाँ उनको शल्यक्रिया गरी रड निकालियो । अपरेसन सकिँदा बेलुका साढे साढे ६ बजेको थियो । ‘बाँच्लाजस्तो लागेको थिएन । आफन्तहरु सबै रुँदै आएका हौं’ नेपालीले भने ‘भैरहवामा एउटा पेनकिलर हालिदिनुस् भन्दा पनि मान्नुभएन ।’

तिलाको सोमबार बेलुकासम्म होस आएको छैन । त्रिवि शिक्षण अस्पतालमा डा. उत्तमकृष्ण श्रेष्ठसहितको टिमले तिलाको अपरेसन गरेको थियो । जुन अपरेसनले उनको शरीरबाट साढे २८ घण्टापछि रड निकाल्न सफल भयो ‘कम्तीमा विरामी बचाउन सक्यौं । दशैं मान्ने गरी घर पठाइदिन्छौं भन्नुभएको छ’ नेपालीले भने ।