निरंजन साह,जनकपुरधाम । प्रदेश नम्बर दुईका सामुदायिक विद्यालयमा कार्यरत शिक्षकहरूले कक्षाकोठा छाडेर सामाजिक विकास मन्त्रालय घेराउ गरेको छ।

नेपाल शिक्षक महासंघको आह्वानमा आज प्रदेशका शिक्षकहरूले मन्त्रालय घेराउ गरेका छन ।महासंघको अगुवाइमा सामुदायिक विद्यालयका शिक्षकहरू चरणवद्ध आन्दोलन गर्दै आइरहेका छन्। प्रदेश नम्बर दुईका आठवटै जिल्लाबाट जनकपुर पुगेको शिक्षकहरू विभिन्न माग अगाडि सार्दै मन्त्रालय घेराउ गरेका छन ।

नगर क्षेत्रको परिक्रमा गर्दै जनकपुर चुरोट कारखाना परिसरभित्र रहेको सामाजिक विकास मन्त्रालयमा आन्दोलनरत शिक्षकहरूलाई सुरक्षाकर्मीले प्रवेश दिएको थिएन। सुरक्षाकर्मीले मन्त्रालय परिसरभित्र प्रवेश गर्न रोक लगाएपछि शिक्षकहरू सडकमै बसेर धर्ना दिएका छन । उनीहरू धर्नाका लागि सडकमा बसेपछि सवारीसाधनको आवागमनसमेत अवरुद्ध भएको छ ।

शिक्षकहरूको प्रदेशस्तरीय विरोध कार्यक्रममा नेपाल शिक्षक संघका केन्द्रीय अध्यक्ष राजेन्द्रराज पौडेल, शिक्षक महासंघका महासचिव लक्ष्मी किशोरसुवेदी, नेपाल शिक्षक संघ प्रदेश नम्बर दुईका अध्यक्ष मेघनाथ यादवलगायत केन्द्रीय नेताहरूको उपस्थिति रहेकोे थिए ।

शिक्षक महासंघ गुणस्तरीय शिक्षका लागि राजनीतिक दलहरूले घोषणापत्रमा जारी गरे अनुसार कुल बजेटको २० प्रतिशत र कुल गार्हस्थ उत्पादनको ४ प्रतिशत बजेट शिक्षा क्षेत्रमा विनियोजन गर्न माग गरेका छन ।