काठमाडौंं, असार १९ । गण्डकी प्रदेश सभा सदस्य राजीव गुरुङ (दीपक मनाङे) औपचारिक रुपमा नेपाल कम्युनिस्ट पार्टीमा (नेकपा) प्रवेश गरेका छन् । उनीसँगै विप्लव समूहका माछापुच्छ्रे गाउँपालिकाका संयोजक पुष्प कार्की बिहीबार बिहान नेकपा प्रवेश गरेका हुन् ।

उनीहरुलाई गण्डकी प्रदेशका मुख्यमन्त्री एवं नेकपाका स्थाई कमिटी सदस्य पृथ्बी सुब्बा गुरूङले पार्टीमा स्वागत गरेका हुन् । मनाङेलाई टीका लगाउँदै र नेकपाको विधान हस्तान्तरण गरेर गुरुङले पार्टीमा स्वागत गरे । मनाङे र कार्कीलाई पार्टीमा प्रवेश गराएपछि मुख्यमन्त्री गुरुङले देशको विकास र जनताको पार्टी भएकाले अन्य क्षेत्रमा अलमल नगरी नेकपामा आवद्ध हुनुपर्ने बताए ।

मनाङबाट प्रदेशसभामा स्वतन्त्र उम्मेदवारी दिएका मनाङे नेकपाकै सहयोगमा प्रदेशसभामा विजयी भएका थिए । तर फौजदारी मुद्दामा उच्च अदालत पाटनबाट दोषी ठहर भएपछि उनले लामो समय सपथ लिन पाएका थिएनन् । उक्त मुद्दामा सर्वोच्चमा पुनरावेदन गरेका गुरुङलाई सर्वोच्च अदालतले थुनामा नबसी मुद्दा लड्न सक्ने गरी बाटो खोलिदिएपछि मनाङेले प्रदेश सांसदको रुपमा सपथ लिएका थिए ।