काठमाडौं – मुलुकमा पछिल्लो समय निरन्तर रुपमा क्लिंकरको आयात घट्दै गएको भए पनि चालु आर्थिक वर्षको पहिलो तीन महिनामा १ अर्बभन्दा धेरै रुपैयाँ बराबरको आयात भएको छ। भन्सार विभागको तथ्यांकअनुसार चालु आर्थिक वर्ष २०७६-७७ को पहिलो तीन महिनामा १ अर्ब ७ करोड २५ लाख रुपैयाको १४ करोड ६६ लाख १९ हजार २ सय १६ केजी सिमेन्ट क्लिंकर आयात भएको छ।

यो सिमेन्ट बनाउन प्रयोग गरिने कच्चा पदार्थ हो। पछिल्लो केही समयदेखि क्लिंकर आयात निरन्तररुपमा घट्दै गएको छ। गत वर्षको सोही अवधिमा क्लिंकरको आयात ४ अर्ब ९७ करोड ७८ लाख रुपैया बराबरको ५७ करोड ३३ लाख १८ हजार केजी भएको थियो। गत आर्थिक वर्षमा ११ अर्ब ६७ करोड ८७ लाखको क्लिंकरको आयात भएको थियो। जबकी त्यो भन्दा अघि २०७४-७५ कम ३० अर्ब २१ करोडको आयात भएको थियो।

हाल मुलुकमा सरकारी र निजी क्षेत्रको गरी १ सय ३३ वटा सिमेन्ट उद्योग दर्ता भएका छन्। उद्योग विभागका अनुसार ६५ वटा सिमेन्ट उद्योग सञ्चालनमा छन् भने अन्य ८ वटा निर्माणाधिन अवस्थामा रहेका छन्। यीमध्ये केहीले आफै क्लिंकर उत्पादन गरिरहेका छन् भने केही अरुबाट किनेर खपत गर्छन्। हाल सिमेन्ट वार्षिक खपत झन्डै ७५ लाख मेट्रिक टन रहेको छ भने उत्पादन ८० लाख मेट्रिक टन हुने गरेको छ। व्यवसायीका अनुसार उद्योगहरुले आफ्नो उत्पादन क्षमताको ६० देखि ६५ प्रतिशत मात्र उपयोग गरिरहेका छन्। हाल सञ्चालनमा रहेका र निर्माणधिन उद्योगहरुको जडित क्षमता २ करोड मेट्रिक टन पुग्ने विभागको तथ्यांकमा उल्लेख छ।