७६ काठमाडौं , १५ माघ: नेपाल कम्युनिष्ट पार्टी (नेकपा) केन्द्रीय कमिटी बैठक आजदेखि सुरु हुँदैछ । नेकपा सचिवालयको हिजो बेलुका बसेको बैठकले आज बिहान ११ बजे बैठक सुरु गर्ने निर्णय गरेको छ । सचिवालय बैठकले आजदेखि बस्ने केन्द्रीय कमिटी बैठकको कार्यसूची तय गरेको छ ।

बैठकको सुरुमा प्रधानमन्त्री समेत रहेका अध्यक्ष केपी शर्मा ओलीले सम्बोधन गर्नुहुनेछ । त्यसपछि अर्का अध्यक्ष पुष्पकमल दाहालले राजनीतिक प्रतिवेदन पेस गर्नुहुनेछ । त्यसपछि महासचिव विष्णु पौडेलले सांगठनिक र विधान संशोधनको प्रस्ताव पेस गर्नुहुनेछ । बुधबार नै सातवटै प्रदेशका अध्यक्षले आ-आफ्नो प्रदेशको रिपोर्ट पेस गर्नेछन् ।

बिहीबारबाट समूहगत छलफल हुने नेकपा सचिवालयको निर्णय छ । विसं २०७७ चैतको मसान्तसम्म पार्टीको एकता महाधिवेशन गर्ने स्थायी कमिटीले पेश गरेको प्रस्ताव केन्द्रीय कमिटीमा रहने प्रवक्ता नारायणकाजी श्रेष्ठले जानकारी दिनुभएको छ ।