७६ काठमाडौं , १५ माघ: सर्वोच्च अदालतले सभामुख अग्नि सापकोटाविरुद्ध दायर रिटमा अन्तरिम आदेश दिन अस्वीकार गरेको छ । दुई दिन अघि सभामुख बनेका सापकोटालाई सभामुख नबनाउन माग गर्दै दायर रिटमाथि न्यायाधीश सपना प्रधान मल्लको इजलासले अन्तरिम आदेश दिन अस्वीकार गरेको हो ।

वरिष्ठ अधिवक्ता दिनेश त्रिपाठीले शुक्रबार दायर गरेको रिटमाथि सुनुवाई गर्दै सर्वोच्च अदालतकी न्यायाधीश सपना प्रधान मल्लको इजलाशले मंगलबार विपक्षीका नाममा कारण देखाउ आदेश जारी गरेको हो । वरिष्ठ अधिवक्ता त्रिपाठीले सिन्धुपाल्चोक क्षेत्र नम्बर १ का सांसद सापकोटालाई सभामुख निर्विचित गर्ने प्रक्रिया रोक्नका लागि आदेश जारी गर्न माग दाबी गर्दै सर्वोच्च अदालतमा रिट दायर गरेका थिए ।

त्रिपाठीको रिटमाथि सुनुवाईका लागि आइतबार न्यायाधीश हरि प्रसाद फुयालको इजलाशमा पेशी तोकिएकोमा उनले हेर्न नमिल्ने भएपछि सुनुवाई स्थगित भएको थियो । प्रधानन्यायाधीश चोलेन्द्र शम्शेर राणाले सोमबार न्यायाधीश मल्लको इजलाशमा पेशी तोकेका थिए । सोमबार बहस नसकिएपछि रिटको सुनुवाई हेर्दा हेर्दैमा राखिएको थियो । मंगलबार बहस सकिएपछि न्यायाधीश मल्लको इजलाशले कारण देखाउ आदेश जारी गरेको हो ।

सर्वोच्चले जारी गरेको आदेशमा कुनै कसुरको जाहेरी परी आरोप लागेको व्यक्ति उपर अनुसन्धान भइरहेको अवस्थामा सार्वजनिक पद धारण गर्न अयोग्य हुने वा सार्वज्निक पदमा नियुक्तिका लागि अयोग्य हुने गरी कुनै कानूनी व्यवस्था नरहेको समेत उल्लेख गएिको छ ।

यद्यपि, सापकोटाविरुद्ध नै यसअघि दायर भएको रिटको सुनुवाईका क्रममा जारी भएको अन्तरिम आदेशअनुसार उनीविरुद्धको कर्तब्य ज्यानको मुद्दाको अवस्थाबारे भने जवाफ माग गरिएको छ । सापकोटा भने सभामुखमा निर्वाचित भएर पद्‌भार समेत सम्हालिसकेका छन् । सापकोटाले मंगलबार बसेको प्रतिनिधि सभा बैठकको अध्यक्षता समेत गरिसकेका छन् ।