काठमाडौं । राष्ट्रिय वाणिज्य बैंक सञ्चालक समितिको सदस्यमा नियुक्त भएर विवादमा परेपछि शपथ रोकिएको प्रा डा उपेन्द्र कोइरालाले आज शपथ लिएका छन् । वाणिज्य बैंक सञ्चालक समितिका निमित्त अध्यक्ष एवं अर्थ मन्त्रालयका सहसचिव धनिराम शर्माले कोइरालालाई सपथ गराएका हुन्।

यस अघि गत भाद्र ७ गते वाणिज्य बैंकको अध्यक्षमा नियुक्त गरिएका प्रा डा कोइरालाको चौतर्फी विरोध भएसँगै शपथ रोकिएको थियो ।
यस अघि बाणिज्य बैंकका अध्यक्ष निर्मलहरि अधिकारीलाई राजस्व बोर्डको सदस्यमा नियुक्ति गरी कोइरालालाई बैंकको अध्यक्ष चयन गर्न लागिएकोमा चौतर्फी विरोध पछि उनको शपथ रोकिएको थियो । कोइराला उपप्रधान तथा रक्षामन्त्री इश्वर पोखरेलका सम्धी हुन् । यो समेत गरी उनले पाएको सातौं सरकारी नियुक्ति हो । यस अघि उनी २०५१ सालको तत्कालीन एमाले सरकारको पालामा खाद्य संस्थानको महाप्रबन्धक भए । खाद्य संस्थानको महाप्रबन्धक भएपछि उनी महेन्द्र मोरङ बहुमुखी क्याम्पसको प्रमुख बनाइए ।

त्यसपछि बिराटनगरकै स्नातकोत्तर क्याम्पसको प्रमुख भए । २०६१ मा इश्वर पोखरेल उद्योग, बाणिज्य तथा आपूर्ति मन्त्री भएको समयमा उनी आयल निगमको कार्यकारी अध्यक्ष नियुक्त भए । आयल निगमको कार्यकारीबाट कार्यकाल सकिएपछि बीचमा केही समय खाली बसे । त्यसपछि पुनः उनी उच्च माध्यमिक शिक्षा परिषदको उपाध्यक्षमा नियुक्त भए । उच्च मावि शिक्षा परिषदको उपाध्यक्षबाट निवृत्त भएपछि केही समय राजेन्द्र खेतानको लक्ष्मी बैंकको अध्यक्ष भए ।