काठमाडौं । सर्लाहीका व्यवसायी अर्जुन रायमाझीले आफूलाई गोली हान्न बागमती नगरपालिकाका लेखा अधिकृत विश्वराज पोखरेलले सुपारी दिएको आरोप लगाएका छन् । आज (मंगलबार) रिपोर्टर्स क्लब नेपालमा पत्रकार सम्मेलन गर्दै रायमाझीले पोखरेलले ३ जना भारतीय सार्प सुटरलाई सुपारी दिएर आफ्नो हत्या गर्न खोजेको आरोप लगाएका हुन् ।

‘भारतीय सार्प सुटरलाई लगाएर बागमती नगरपालिकाका लेखा अधिकृत विश्वराज पोखरेलले मेरो हत्या गर्न खोजे ,’ रायमाझीले भने । हरिवन बजारको कडरिया चोकमा भारतबाट आएका ३ जना सुटरले आफूलाई गोली हान्ने प्रयास गरेपनि जोगिएको रायमाझीले बताए । हरिवन नगरपालिका–११ घर भएका रायमाझीले ‘टार्गेट मिस’ भएपछि सुटरसँगै आएका एकजना युवाले सो योजनाबारे आफूलाई जानकारी दिएको दाबी गरे । योजना चुहिएपछि आफूले विश्वराज सहित ८ जनालाई विपक्षी बनाएर जिल्ला प्रहरी कार्यालय सर्लाहीमा जाहेरी दिएको बताए ।

आफूलाई एउटै स्कुल पढेका विश्वराज पोखरेलले गोली हान्न भारतीय सुटरलाई सुपारी दिएकोबारे उनले भने,‘विश्वराज र म एउटै स्कुल पढेका हौ तर उनी अलि सिनियर हो । मलाई मार्नलाई यति सम्म गर्ला भनेर कहिल्यै सोचेको थिइन् ।’
रायमाझीले विश्वराजको आफन्तको जग्गाको सिमानामा रहेको, विश्वराजका आफन्तले भोगचलन गरेको सम्पत्ति उनीहरुकै सल्लाहमा खरिद गरेको बताए । तर पछि विभिन्न वहाना गरेर विवाद झिकेपछि आफु बाध्य भएर सोही विषयमा अदालत जान बाध्य भएको सुनाए । अहिले मुद्दा विचाराधिन अवस्थामा रहेको पनि जानकारी दिए । तर, आफूलाई मार्नलाई विश्वराजले सुपारी दिएको र मार्ने योजना बनाएको कुरा आफुले कहिल्यै नसोचेको बताए । विश्वराजको सबै प्रमाण नबिल बैंकको सिसिटिभिमा कैद भएको जानकारी दिँदै उनले आवश्यकता परे पेश गर्न सक्ने पनि बताए ।

लेखापाल विश्वराज पोखरेल र उनका आफन्त (भाई) ठेकेदार युवराज पोखरलले आर्थिक चलखेल गर्ने गरेको र आफुलाई मार्ने योजना बनाएको हुन सक्ने उनले बताए । दुई जनाको सल्लाहमा युवराजले बोर्डरबाट आफ्नै केहीलाई गाडीको पछाडी राखेर र केहीलाई अर्को गाडीमा सुटरहरुलाई ल्याएको उनले आरोप लगाए । उनले भने,‘सुटरहरुलाई ल्याएर जंगलको होटलमा खाजा खाएको पनि सुन्नमा आएको छ । सुटरकै एकजना साथीले मलार्ई त्यसको बारेमा जानकारी दिएको हो ।

सुटरहरु बसेको होटलमा सरकारी मोटरसाइकलमा विश्वराज आफै पुगेर उनीहरुले खाएको र सुतेको पैसा तिरेको पनि प्रमाण आफुसँग भएको सुनाए । विश्वराजले नै सबै सुटरलाई आफू हिड्ने र बस्ने स्थानको बारेमा जानकारी दिएको जिकिर गरे ।
आफूलाई मार्ने त्यत्रो योजना बनाउँदा पनि जोगिएकोमा इश्वरीय शक्तिको कारण भएको बताए । उनले भने,‘योजनाकार मध्येका एकजना परिपक्व सुटरलाई मेरो घर हेर्न पठाइयो । सोही समयमा मेरो आमाले तुलसीको मोठमा पानी चढाएको देखेर ओहो यस्तो राम्रो परिवारको सन्तान मार्न आएकोमा पश्चाताप भई आमालाई मलाई मार्ने योजनाबारे सबै बताएका हुन् ।

उनले विश्वराज अहिले लुकेर बसेको आरोप लगाउँदै उनको मोवाइल पनि स्विच अफ भएको बताए । उनले भने,‘अपराधी प्रहरी भन्दा पनि एक कदम अगाडि छ । मोबाइल स्विच अफ छ । परिवारसँग पनि कनेक्सन नरहेको प्रहरी बताउँछ ।

आफू र आफ्नो परिवारको सुरक्षा कायम गर्न माग गर्दै सम्बन्धित निकायमा जानकारी दिएको पनि रायमाझीले सुनाए । ‘स्टे अर्डर आएको पनि २० दिन भईसकेको छ, आरोपीलाई प्रहरीले खोजी गर्दै गर्दापनि पत्ता लगाउन सकेको छैन् ।’ उनले भने,‘कस्को संरक्षणमा बसेको छ ? सरकारी कर्मचारी भएर पनि यसरी लुक्न सक्दा आश्चय भएको छ, ऊ निर्दोष भएको भए किन प्रहरीसँग लुकेर हिड्थ्यो ।

गत पुस २२ मा जिल्ला अदालत सर्लाहीले योजनाकार विश्वराज पोखरेल र सुटर मगाउने बलरा नगरपालिका स्थित सुदामा बस्ने सुरेन्द्र सिंहविरुद्ध पक्राउ पुर्जी जारी गरेको छ । ज्यान मार्ने उद्देश्यले आपराधिक षड्यन्त्र गरेको कसुरमा उनीहरूलाई पक्राउ गर्न अदालतले अनुमति दिएको हो ।