सोमबार सेयर बजार परिसूचक (नेप्से) २१.२६ अंकले बढेको छ। यसअघिका पाँच कारोबार दिनमा लगातार घटेको बजार आज दोहोरो अंकका साथ उकालो लागेको हो।

कारोबार सुरु भएदेखि बढेको नेप्से परिसूचक १९०४.४३ बिन्दुमा पुगेको छ। आज कारोबार भएकामध्ये १४८ कम्पनीको मूल्य बढेको छ। ३१ कम्पनीको मूल्य घट्दा पाँच कम्पनीको मूल्य चाहिँ स्थिर रह्यो।

सोमबार २२६ कम्पनीको २४ लाख ५२ हजार कित्ता सेयर खरिदबिक्री हुँदा ९४ करोड ६० लाख रुपैयाँ बराबरको कारोबार भएको छ।

आज तारागाउँ रिजेन्सी होटलमा सकारात्मक सर्किट लागेको छ। त्यस्तै सप्तकोसी विकास बैंक, बुद्धभूमि नेपाल हाइड्रापावर, रिभर फल्स पावरलगायत कम्पनीका लगानीकर्ता बढी कमाउनेको सूचीमा परेका छन्।

लक्ष्मी इक्युटी फन्ड, नाग्दी ग्रुप पावर, मन्दाकिनी हाइड्रोपावरलगायत कम्पनीका लगानीकर्ता चाहिँ बढी गुमाउनेको सूचीमा छन्। सोमबार कारोबार रकमका हिसाबले शिवम् सिमेन्ट पहिलो स्थानमा रह्यो। यसको करिब ११ करोड रुपैयाँ बराबरको कारोबार भएको छ।

दोस्रो नम्बरमा रहेको हिमालयन डिस्टिलरी लिमिटेडको ९ करोड रुपैयाँको सेयर खरिदबिक्री भएको छ। आज नेप्सेमा सूचीकृत सबै उपसमूहको सूचक बढेको छ। विकास बैंक, फाइनान्स, होटल तथा पर्यटन, जलविद्युत् र अन्य उपसमूहमा लगानीकर्ता बढी आकर्षित भए।