काठमाडौं । हिन्डनबर्गले आफ्नो प्रतिवेदनमा अदानी समूहलाई ‘कर्पोरेट जगतमा सबैभन्दा ठूलो ठगी’ गरेको आरोप लगाएको छ। अदानी समूहको सबैभन्दा ठूलो कम्पनी अदानी इन्टरप्राइजेजको एफपीओ सुरु हुन लागेको बेला यो आरोप लागेको हो ।

यो रिपोर्टका कारण अदानी समूहको बजार पुँजीकरण शुक्रबार एकै दिनमा ३।३७ लाख करोड भारतीय रुपैयाँले घटेको इन्डियन एक्सप्रेसले आफ्नो रिपोर्टमा बताएको छ । यसमा लाइफ इन्स्योरेन्स कर्पोरेशन अर्थात एलआईसीले यसको मार खेप्नुपरेको छ । यसका कारण देशको सबैभन्दा ठूलो बीमा कम्पनी एलआईसीले १६, ६२७ करोड रुपैयाँ गुमाउनु परेको छ । अदानी समूहका शीर्ष पाँच कम्पनीहरूमा एलाआईसी सबैभन्दा ठूलो स्वदेशी (गैर–प्रवर्द्धक) लगानीकर्ता हो।

केबल दुई दिनमा, अदानी समूहका कम्पनीहरूमा एलआईसीको लगानीको मूल्य २२ प्रतिशतले घट्यो। शुक्रबार यसको मूल्य ७२,१९३ करोड रुपैयाँ थियो तर मंगलबार (शनिबार र आइतबार शेयर बजारमा कारोबार बन्द) ५५,५६५ करोड रुपैयाँमा झरेको थियो । शुक्रबार पनि एलआईसीको सेयर मूल्य ३.५ प्रतिशतले घटेको छ भने दुई दिनमा यो ५.३ प्रतिशतले घटेको छ ।