काठमाडौं । सरकारले काठमाडौं महानगरपालिका प्रमुख बालेन्द्र साहलाई जिम्मेवारीबाट अलग नहुन सचेत गराएको छ ।

मंगलबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद्को बैठकले काठमाडौं उपत्यकाको फोहोर उठाउने जिम्मा स्थानीय तहको भएकाले त्यो जिम्मेवारीको हेक्का राख्न प्रमुख साहलाई सचेत गराउने निर्णय गरेको छ ।

प्रमुख साहले सरकारले आफ्नो कुरा नसुनेको भन्दै शीतलनिवास, बालुवाटार र सिंहदरबारको फोहोर नउठाउने निर्णय गरेका थिए । यो निर्णय पछि यी तीन महत्वपूर्ण स्थानबाट फोहोर उठेको छैन ।

फाहोर उठाउदिन भन्ने काठमाडौं महानगरपालिकाका प्रमुख साहको अभिव्यक्ति अव्यवहारिक रहेको निष्कर्ष निकाल्दै मन्त्रिपरिषद् बैठकले नीतिगत व्यवस्थाको परिपालना गर्न आग्रह गरेको छ ।