काठमाडौं । सशस्त्र प्रहरीले ०७९ सालको वार्षिक प्रगति विवरण सार्वजनिक गरेको छ । सशस्त्र प्रहरी प्रधान कार्यालय हलचोकमा सोमवार भएको पत्रकार सम्मेलनमा सशस्त्रले वार्षिक प्रगति विवरण सार्वजनिक गरेको हो ।

सशस्त्रले ०७९ सालमा एफपीयू(फम्र्ड पुलिस युनिट) मिशन छानौट निर्देशिका संशोधन, कमाण्डको पूर्वानुमान सूची प्रकाशन, बीएमआई(बडि मास इन्डेक्स)का लागि कार्यविधि निर्माण प्रकृया अघि बढाउने कार्यलाई मुख्य उपलब्धी ठानेको छ ।

त्यसैगरी, कर्मचारी वृतिविकासलाई प्रोत्साहन गर्ने उद्येश्यले १६ हजार ४८ सशस्त्र प्रहरी कार्मचारीको बढुवा, विशेष बढुवा, पदास्थापन, सरुवा, सरुवा समायोजन तथा नयाँ नियुक्तिलाई पनि सशस्त्रले प्रगति मानेको छ । यही वर्ष सशस्त्रले कुटनीतिक नियोग तथा विभिन्न नेतृत्वसँग भेटघाटको क्रममा पालना गर्नुपर्ने आचरण सम्बन्धी स्थायी आदेश जारी गरिएको छ ।

त्यसैगरी सशस्त्रले खेलकुदको माध्यमबाट राष्ट्रको मान प्रतिष्ठा र गौरव बढाउन विशेष योगदान पुर्याएका १६ जना सशस्त्र प्रहरीलाई एक तह विशेष बढुवा गरेको छ । सम्मान तथा पुरस्कार वितरणका लागि पनि सशस्त्रले विशेष कार्यविधि तयार गरेको छ ।

यस अवधिमा सशस्त्रले नीतिगत कार्यतर्फ १२, संस्थागत कार्यतर्फ २६ र संरचनागत कार्यतर्फ ११ वटा काम सम्पन्न गरेको छ । यसैगरी सशस्त्रले संगठन सदृढिकरणका लागि विभिन्न १८ वटा योजना योजना तयार गरेको छ ।

कार्यप्रगति विवरण प्रस्तुत गर्दै सशस्त्र प्रहरीका प्रवत्ता तथा एसएसपी राजेन्द्र खड्काले ०७९ सालमा सशस्त्र प्रहरीले उल्लेख्य काम गर्न सकेको बताए ।