काठमाडौं। एनएमबि क्यापिटलले सामूहिक लगानी कोष एनएमबि हाईब्रिड फण्ड एल–२ को इकाई खरिदका लागि आवेदन अवधि भोलि फागुन ८ गतेसम्म थपिएको छ। यो फण्ड माघ २४ गतेदेखि निष्काशन तथा बिक्रीमा ल्याइएको हो। फण्डको प्रतिइकाई अंकित मूल्य रु. १० राखिएको छ भने जम्मा १ अर्ब २० करोड रुपैयाँ बराबरको १२ करोड इकाई बिक्रीमा ल्याइएको छ।

एनएमबि म्युचुअल फण्ड अन्तर्गत सञ्चालन हुने यो दश वर्षे बन्दमुखी योजना हाईब्रिड प्रकृतिको भएकाले यसमा इक्विटी फण्डभन्दा तुलनात्मक रूपमा कम जोखिम रहेको छ। फण्डमा न्यूनतम १०० देखि १ करोड २० लाख इकाईसम्म खरिद गर्न सकिनेछ, जसको मूल्य रु. १ हजार देखि रु. १२ करोड सम्म हुनेछ।

फण्डको कुल १२ करोड इकाई मध्ये १४ प्रतिशत (१ करोड ६८ लाख इकाई) कोष प्रवर्धक एनएमबि बैंकलाई र १ प्रतिशत (१२ लाख इकाई) योजना व्यवस्थापकलाई सुरक्षित गरिएको छ भने बाँकी १० करोड २० लाख इकाई सर्वसाधारणलाई बिक्री गरिएको छ। फण्डको निष्काशनका लागि गरिएको रेटिङ्गमा कोष प्रवर्धकलाई ‘क्रेडिट रेटिङ्ग’ र योजना व्यवस्थापकलाई ‘उच्च विश्वास’ रेटिङ्ग प्रदान गरिएको छ।

फण्डमा लगानी गर्न चाहने लगानीकर्ताले धितोपत्र बोर्डबाट स्वीकृति प्राप्त गरेका सम्पूर्ण आस्बा सदस्य बैंक तथा वित्तीय संस्था र तोकिएका शाखा कार्यालयबाट आवेदन दिन सकिनेछ। साथै, सिडिएस एण्ड क्लियरिङ्ग लिमिटेडको ‘मेरो शेयर’ मार्फत अनलाइन आवेदन दिन पनि सकिनेछ।