काठमाडौं । कृषि तथा पशुपन्छी विकास मन्त्री रामनाथ अधिकारीले कृषि मन्त्रालयले किसानहरूको हितमा काम गरिरहेको बताउँदै सिँहदरवार चारेर अनुदान लिने विगतको प्रवृत्तिको अन्त्य भएको घोषणा गर्नुभयो ।

युवा किसान सञ्जालले आयोजना गरेको “किसान सम्मान एवं अन्तरक्रिया” कार्यक्रममा मन्त्री अधिकारीले आफूले मन्त्रालयको नेतृत्व सम्हालेको आठ महिनाको अवधिमा कृषि र किसानहरूको हितमा धेरै कामहरू गरिएको बताउनुभयो । उहाँले अझै धेरै कार्यहरू गर्न बाँकी रहेको र यसको सकारात्मक प्रतिफल देखिने बताउनुभयो ।

मन्त्री अधिकारीले कृषि ऐन चाडै अघि बढाउने तयारी भएको र यसले कृषि मार्फत समृद्धि ल्याउने उद्देश्य राखेको बताउनुभयो । उहाँले ऐन चाडै मन्त्रीपरिषद् हुँदै संसद्मा पुग्ने बताउनुभयो । यस ऐनले कृषि मार्फत गरिवी घटाउने र किसानहरूलाई आत्मनिर्भर बनाउने लक्ष्य राखेको छ ।

किसानहरूलाई परिचयपत्र वितरण गर्ने कार्य यसै वर्षदेखि सुरु गरिने बताउँदै मन्त्री अधिकारीले प्रधानमन्त्रीबाट नै परिचयपत्र वितरण सुरु गर्ने तयारी भएको बताउनुभयो ।

मन्त्री अधिकारीले विगत पाँच वर्षमा कृषि मन्त्रालय मार्फत १ खर्ब ७ अर्ब रुपैयाँ अनुदान वितरण गरिएको र यसको उपलब्धि खोज्ने काम भएको बताउनुभयो । उहाँले सिँहदरवार चारेर अनुदान लिने प्रवृत्तिको अन्त्य भएको र आफू मन्त्रालयको नेतृत्वमा रहँदा अनुदानको दुरुपयोग हुन नदिने प्रतिबद्धता व्यक्त गर्नुभयो ।

किसानहरूलाई समयमै मल र बीउ नपुग्ने समस्याको बारेमा प्रश्न उठ्दा मन्त्री अधिकारीले रासायनिक मलमा ठूलो रकम अनुदान दिइएको र यसको सहज वितरणमा प्रदेश र स्थानीय तहको महत्वपूर्ण भूमिका रहेको बताउनुभयो ।

मन्त्री अधिकारीले कृषि क्षेत्रमा पारदर्शिता र जवाफदेहिता बढाउने र किसानहरूको जीवनस्तर सुधार्ने दिशामा मन्त्रालयले अगाडि बढिरहेको बताउनुभयो ।