मकवानपुर । उत्तरी मकवानपुरको आर्थिक विकासको प्रमुख धमनी मानिने चित्लाङ-चन्द्रागिरी-थानकोट सडक खण्डको स्तरिकरण र कालोपत्रे कार्यका लागि १५ करोड रुपैयाँको ठेक्का आह्वान गरिएको छ।

यस कार्यमा सत्तारुढ दलका मुख्य सचेतक तथा मकवानपुरका संघीय सांसद महेश कुमार बर्तौलाको प्रमुख भूमिका रहेको छ। उनको पहलमा यस आर्थिक वर्षमा विनियोजित ४ करोड ३१ लाख रुपैयाँलाई भौतिक पूर्वाधार तथा यातायात मन्त्रालयले १० करोड ६९ लाख थप गरी कुल १५ करोड रुपैयाँको ठेक्का सार्वजनिक गरेको हो।

यस अघि गत आर्थिक वर्षमा पनि बर्तौलाकै पहलमा यही सडकमा ७ करोड ९९ लाख रुपैयाँ खर्च गरी सुधार कार्य गरिएको थियो। यसबीच दुर्घटनाप्रवण सेतो पहरामा तार जाली (क्र्यास ब्यारियर) पनि लगाइएको छ।

बर्तौलाका सचिव आशिष अस्लामीले बताए अनुसार, सांसद बर्तौला चित्लाङ-थानकोट सडकलाई पूर्ण रूपमा स्तरिकरण गरी उत्तरी मकवानपुरको थाहा नगरलाई आर्थिक रूपमा समृद्ध बनाउन चाहन्छन्। उनले यो सडकलाई थाहादेखि कैलाश, राक्सिराङ हुँदै मनहरी सम्म विस्तार गर्ने योजना राखेका छन्। यसै अन्तर्गत चालु आर्थिक वर्षमै १ करोड ६२ लाख रुपैयाँबाट “रुपचन्द्र विष्ट मार्ग” नामकरण गरी निर्माण कार्य सुरु गरिएको छ।

सांसद बर्तौलाले थाहा नगरलाई केन्द्रबिन्दु बनाई भीमफेदी र इन्द्रसरोबर जस्ता पर्यटकीय गन्तव्यसहित एकीकृत पर्यटन क्षेत्र विकास गरी ग्रामीण अर्थतन्त्र मजबुत पार्ने लक्ष्य राखेका छन्। यसले क्षेत्रीय विकासलाई गति दिने अपेक्षा गरिएको छ।