काठमाडौँ । नेपाल दूरसञ्चार प्राधिकरणका अध्यक्ष भुपेन्द्र भण्डारीविरुद्ध अख्तियार दुरुपयोग अनुसन्धान आयोगमा उजुरी परेको छ। नागरिक समाजका तर्फबाट परेको उक्त उजुरीमा भण्डारीले आफ्नो नियुक्तिको क्रममा पेश गरेको कार्यअनुभव कागजात नक्कली रहेको आरोप लगाइएको छ।

उजुरीमा भनिएको छ कि भण्डारीले एकै समयमा नेपाल र बुरुण्डीमा दुई फरक कम्पनीमा कार्यरत भएको देखिने कागजात पेश गरेका छन्, जुन स्वाभाविक रूपमा असम्भव देखिन्छ। उनले नेपालस्थित तत्कालीन स्पाड्स नेपाल (हालको एनसेल) मा सन् २००८ को जनवरी २० सम्म डेपुटी चिफ फाइनान्स अफिसरको रुपमा कार्य गरेको विवरण पेश गरेका छन्। तर, अर्कोतर्फ, उनले बुरुण्डीस्थित लासेल एसयु कम्पनीमा सन् २००८ को जनवरीदेखि २०१६ सम्म प्रमुख कार्यकारी अधिकृतको रूपमा काम गरेको देखाइएको छ।

यस्ता अविश्वसनीय विवरणका आधारमा उजुरीकर्ताहरूले भण्डारीले नक्कली कागजातमार्फत राज्यलाई ढाँटी नियुक्ति लिएको आरोप लगाउँदै अनुसन्धानको माग गरेका छन्। साथै, उजुरीमा भण्डारीले प्राधिकरणमा अध्यक्ष नियुक्त भएदेखि संस्थाको हितका निम्ति कुनै उल्लेखनीय कार्य नगरेको आरोपसमेत लगाइएको छ।

बुरुण्डीको लासेल एसयु कम्पनी सन् २०२२ मै बन्द भइसकेको भए तापनि सो कम्पनीको अनुभव पेश गरेर नियुक्ति लिइएको भन्दै अख्तियारमा दायर उजुरीमा तत्काल अनुसन्धान गरी कानूनी कारबाहीको माग गरिएको छ। उजुरीकर्ताहरूले यस विषयलाई गम्भीर अपराधको संज्ञा दिँदै प्रमुख आयुक्त समक्ष निष्पक्ष छानबिनको लागि हार्दिक अनुरोध गरेका छन्।