रौतहट । चर्को गर्मी र ढल्किंदो उमेरका बाबजुद भारी बोकेर पसिना बगाइरहेकी रामकलीलाई ‘श्रमिक दिवस’ के हो भन्ने थाहा छैन। ३० वर्ष पार गरेकी रामकलीलाई आफ्नो जीविकोपार्जन कसरी गर्ने भन्ने मात्रै चिन्ता छ।

“कामको ज्याला समयमै पाए हुन्थ्यो,” उनी भन्छिन्। “महँगी आकाशिएको छ, ज्यालाले खान लाउन मुस्किल छ। हामीजस्ता श्रमिकले एक दिन काम नगरे साँझ के खाने भन्ने चिन्ता हुन्छ।”

पुरुषसरह काम गरे पनि महिला श्रमिकले कम ज्याला पाउने गरेको उनीहरू बताउँछन्। कतिपय अवस्थामा पुरुषको तुलनामा महिलाले प्रतिदिन १५० रुपैयाँसम्म कम पाउँछन्।

तर, स्थानीय युवा ध्रुव घिमिरे भन्छन्, “अहिले महिला-पुरुष दुबैले समान ज्याला पाउँछन्। श्रमिक अभावका कारण सबैलाई समान अवसर दिइएको छ।”

ईट्टा उद्योगी व्यवसायी संघका अध्यक्ष रामबिनोद साहका अनुसार, ईट्टा उद्योगमा महिला-पुरुष दुवै कामदारलाई समान ज्याला दिइन्छ र त्यहाँ विभेद हुने सम्भावना छैन।

चन्द्रपुर नगर उद्योग वाणिज्य संघका अध्यक्ष उदयनारायण सापकोटा भने श्रमिकको श्रमको उचित मूल्यांकन हुनुपर्नेमा जोड दिन्छन्।

सन् १८८६ मा अमेरिकाको सिकागोबाट सुरु भएको श्रमिक आन्दोलनको सम्झनामा प्रत्येक वर्ष मे १ मा अन्तर्राष्ट्रिय श्रमिक दिवस मनाइन्छ। रौतहटमा पनि मजदुर सङ्गठनले विभिन्न कार्यक्रम गरेर दिवस मनाउने तयारी गरिरहेको छ।