पोखरा । नेपाली मौलिक खान संस्कृति, पाककला तथा पर्यटन प्रवद्र्धनलाई अन्तर्राष्ट्रिय स्तरसम्म पु¥याउने उद्देश्यसहित नेपाली सेफ सोसाइटी (एनसिएस) गण्डकी प्रदेशको नयाँ कार्यसमिति सर्वसम्मत रूपमा गठन गरिएको छ ।

सोमबार पोखरास्थित होटल म्याजेस्टिकमा सम्पन्न भेलाले ४० सदस्यीय गण्डकी प्रदेश कार्यसमिति चयन गरेको हो । कार्यक्रम पूर्ण भक्ता दाहालको अध्यक्षतामा सम्पन्न भएको थियो ।

उक्त कार्यक्रममा अन्तरास्ट्रिय सेफ सोसाइटीका केन्द्रीय अध्यक्ष अरुण अधिकारी, ईनास आबुधाबी च्याप्टरका क्षेत्रीय अध्यक्ष श्याम लाम्गातेसहित गण्डकी प्रदेशका ११ वटै जिल्लाबाट नेपाली सेफहरूको उल्लेखनीय सहभागिता रहेको थियो ।

कार्यक्रमलाई सम्बोधन गर्दै अध्यक्ष अरुण अधिकारीले नेपाली भान्छे, कुक तथा सेफहरूको विश्व बजारमा छुट्टै पहिचान स्थापित भइसकेको बताए । उनले नेपाली सेफहरू अहिले युरोप, मध्यपूर्व, अमेरिका, अष्ट्रेलिया तथा एसियाका विभिन्न मुलुकमा आफ्नो क्षमता, मेहनत र सिर्जनशीलताका कारण चर्चित बन्दै गएको उल्लेख गरे ।

उनका अनुसार नेपाली खानाको स्वाद, अनुशासन र कार्यकुशलताका कारण अन्तर्राष्ट्रिय होटल तथा रेस्टुरेन्ट क्षेत्रमा नेपाली सेफहरूको माग निरन्तर बढिरहेको छ । ‘आज नेपाली सेफहरू केवल श्रमिक होइनन्, नेपालका सांस्कृतिक दूतका रूपमा विश्वभर परिचित भइरहेका छन्,’ अध्यक्ष अधिकारीले बताए ।

उनले वैदेशिक रोजगारीलाई केवल सामान्य श्रममा सीमित नराखी दक्ष कुक तथा सेफ उत्पादनमा राज्यले प्राथमिकता दिनुपर्ने धारणा राखे ।

अध्यक्ष अधिकारीले नेपाली युवालाई पाककला क्षेत्रमा आकर्षित गर्न सीप, तालिम र अन्तर्राष्ट्रिय अवसरसँग जोड्न आवश्यक रहेको उल्लेख गरे । उनले सरकार र निजी क्षेत्रबीच सहकार्य गरेर नेपाली पाककलालाई विश्वस्तरमा स्थापित गर्ने अभियानमा आफूहरू सक्रिय रहेको पनि जानकारी दिए ।