काठमाडौं । सूचना तथा सञ्चार प्रविधि (आईसीटी) क्षेत्रमा सबैभन्दा धेरै कर तिर्ने अग्रणी करदाताका रूपमा एनसेललाई नेपाल सरकारले राष्ट्रिय सम्मान प्रदान गरेको छ। शुक्रबार काठमाडौंमा आयोजित ८औं राष्ट्रिय सूचना तथा सञ्चार प्रविधि दिवस–२०८२ को विशेष समारोहमा प्रधानमन्त्री केपी शर्मा ओलीले एनसेलका मार्केटिङ, कम्युनिकेसन्स तथा सस्टेनेबिलिटी डाइरेक्टर पुनम सिंहलाई सम्मानपत्र प्रदान गरे।

एनसेलले आईसीटी विकास तथा समृद्ध नेपाल अभियानमा उल्लेखनीय योगदान पुर्‍याउँदै गत आर्थिक वर्षमा २० अर्ब ३० करोड रुपैयाँ कर तथा शुल्क सरकारलाई बुझाएको थियो। कम्पनीले स्थापना कालदेखि हालसम्म ३४० अर्ब रुपैयाँभन्दा बढी राजस्व तिरेको छ। यस उपलब्धिका लागि एनसेल यसअघि पनि उत्कृष्ट करदाता तथा सर्वोत्कृष्ट आयकरदाताका रूपमा विभिन्न सम्मानहरू प्राप्त गरिसकेको छ।

एनसेलका प्रमुख कार्यकारी अधिकृत जाब्बोर कायुमोभले सरकारबाट प्राप्त सम्मानप्रति आभार व्यक्त गर्दै ‘डिजिटल नेपाल’ निर्माणमा कम्पनीको निरन्तर योगदान जारी रहने प्रतिवद्धता जनाए। साथै, एनसेल फाउन्डेसनमार्फत देशभर सञ्चालन भएका सामाजिक उत्तरदायित्व कार्यक्रमहरूले १ करोड ३० लाखभन्दा बढी जनतामा प्रत्यक्ष वा अप्रत्यक्ष रूपमा प्रभाव पारेको जानकारी दिइएको छ।