काठमाडौँ । कोलकातास्थित प्रतिष्ठित संगीत संस्था इटर्नल साउण्ड्स LLP ले मे ७, २०२५ मा काठमाडौँमा “जुनकिरी” नामक नयाँ संगीत परियोजना सार्वजनिक गरेको छ। सुमन थापाले तयार पारेको यो परियोजनामा नेपाली र अंग्रेजी गीतहरूको संयोजन गरिएको छ, जसमा नेपाली परम्परागत वाद्ययन्त्रहरू — जस्तै बँसुरी र सारङ्गी – लाई पश्चिमी शैलीको गीत लेखन र संगीतसँग मिश्रण गरिएको छ।

इटर्नल साउण्ड्सले १.२० लाखभन्दा बढी सब्सक्राइबरहरूको साथमा गुणस्तरीय र स्थायी संगीतको पक्षमा काम गर्दै आएको छ। कम्पनीले यसअघि हरीहरन, शुभा मुद्गल, सोनु निगम, राकेश चौरेसियालगायत दर्जनौं प्रसिद्ध कलाकारहरूसँग सहकार्य गरिसकेको छ। कम्पनीका मुख्य साझेदारहरूमा वित्तीय बजार विज्ञ उत्सव परेख, उद्योगपति मयंक जालान, चलचित्र निर्माता गौरांग जालान, र संगीत गुरु बिक्रम घोष छन्।

“जुनकिरी” परियोजनामा समावेश प्रमुख गीतहरू “मेरो आवाज” र “भ्याली अफ सनशाइन” ले शोक, जीवन र मृत्युसँगको गहिरो भावनात्मक सम्बन्ध उजागर गर्छन्।

इटर्नल साउण्ड्सले आगामी दिनहरूमा जोन म्याकलफलिन, नोरा जोन्स, अनुष्का शंकरजस्ता अन्तर्राष्ट्रिय कलाकारहरूसँग सहकार्य गरेर विश्वस्तरीय परियोजनाहरू ल्याउने योजना बनाएको छ, जसले भारतबाट ग्रामी पुरस्कार योग्य प्रविष्टिहरू तयार गर्न सक्ने सम्भावना बोकेको छ।