काठमाडौं । एनएमबि बैंक लिमिटेडको अगुवाइमा दोलखा जिल्लाको विगु गाउँपालिकामा अवस्थित ४२ मेगावाट क्षमताको लाप्चे तामाकोशी जलविद्युत आयोजनामा ऋण लगानी गर्न वित्तीय व्यवस्थापन सम्पन्न भएको छ। सो आयोजना एनएमबि बैंक लि., नबिल बैंक लि., नेपाल इन्फ्रास्ट्रक्चर बैंक लि., एभरेष्ट बैंक लि., तथा डायनामिक हाइड्रो ईनर्जी प्रा. लि.को साझेदारीमा संचालन हुनेछ।

लाप्चे तामाकोशी आयोजनाको कुल लागत करिब ७ अर्ब रुपैयाँ रहने अनुमान गरिएको छ, जसमध्ये ५ अर्ब २५ करोड रुपैयाँ बैंक तथा वित्तीय संस्थाहरूबाट ऋण स्वरूप लगानी गरिनेछ। यस आयोजनामा एनएमबि बैंक लि. अगुवा बैंकको रुपमा रहनेछ।

साथै, एनएमबि बैंक लि.ले २ मेगावाट क्षमताको चेपे खोला क्यास्केड जलविद्युत आयोजना (चेपे खोला-२) मा पनि एकल ऋण लगानीको व्यवस्था गरेको छ। आयोजनाको अनुमानित लागत रु. ४३ करोड ४० लाख रहेको छ भने एनएमबि बैंक लि.ले रु. ३४ करोड ऋण लगानी गर्नेछ।

उक्त सम्झौतासम्बन्धी कार्यक्रम एनएमबि बैंकका तर्फबाट चिफ, सस्टेनेबल इनर्जी बैंकिङ्ग श्री दिनेश दुलाल र डायनामिक हाइड्रो ईनर्जी प्रा. लि.का अध्यक्ष श्री मोहन विक्रम कार्कीबीच ऋण सम्झौता पत्रमा हस्ताक्षर गरियो।

एनएमबि बैंक लि.का प्रमुख कार्यकारी अधिकृत श्री गोविन्द घिमिरे र कम्पनीका अध्यक्ष श्री कार्कीबीच सम्झौता आदानप्रदान पनि गरिएको थियो। कार्यक्रममा प्रमुख कार्यकारी अधिकृत घिमिरेले एनएमबि बैंकले जलविद्युत परियोजनाहरूको प्राविधिक, वातावरणीय तथा अन्य जोखिमहरूको सूक्ष्म अध्ययन गर्दै उचित समाधान प्रदान गर्दै आएको जानकारी दिए।

त्यस्तै, अध्यक्ष कार्कीले एनएमबि बैंकसँग हालसम्म ८ वटा जलविद्युत परियोजनामा ऋण उपभोग भइसकेको र यस परियोजनाहरू तोकिएको लागत र समयमै सम्पन्न गर्ने प्रतिबद्धता व्यक्त गरे।

एनएमबि बैंक लि.ले हालसम्म ५० भन्दा बढी जलविद्युत आयोजना समावेश गरिसकेको छ।