काठमाडौं । चीनको बेइहाईस्थित ग्वाङसीको टाइसान सर्भिस एरियामा ड्राइभ गर्दै गर्दा एक बीवाईडी सोङ प्लस ईभीमा लगातार तीन पटक चट्याङ प्रहार भए पनि गाडीमा गम्भीर क्षति भएको छैन। चीनको चोङगिङ डेलीका अनुसार, सम्पूर्ण परीक्षणपछि मेकानिकहरूले गाडीको पावर प्याक, मोटर वा इलेक्ट्रोनिक कन्ट्रोल सिस्टममा कुनै समस्या नभएको पुष्टि गरेका छन्।

गाडीको छतमा मात्र साना दुई वटा स्ट्राइक प्वाइन्ट देखिएका छन्। बीवाईडीका ब्रान्ड तथा पब्लिक रिलेसन विभागका जनरल म्यानेजर लि युनफेईका अनुसार, पावर कटअफ प्रोटेक्सन सिस्टमले अकुपेन्ट सेफ्टी र कोर भेइकल सिस्टमलाई सुरक्षित राख्न मद्दत गरेको हो।

बीवाईडीको सोङ प्लस ईभी चीनमा १ लाख ४९ हजार ८ सय आरएमबी (करिब २०,७४० अमेरिकी डलर) देखि १ लाख ७५ हजार ८ सय आरएमबी (करिब २४,४८० अमेरिकी डलर) मूल्यमा उपलब्ध छ। नेपालमा भने यो मोडेल उपलब्ध छैन। हालै मात्र बीवाईडीले एट्टो १ (सिगल ह्याचब्याक ईभी) नेपाली बजारमा करिब २९ लाख रुपैयाँमा ल्याएको छ, जसको निकै चर्चा भइरहेको छ। नेपालमा बीवाईडीको आधिकारिक वितरक साइमेक्स इंक हो, जसले डल्फिन, सिलायन ७, एट्टो ३ लगायतका मोडल बिक्री गर्दै आएको छ।