काठमाडौं । पाकिस्तानको ७९औँ स्वतंत्रता दिवस नेपालस्थित पाकिस्तानी दूतावासमा धूमधामका साथ मनाइयो। दूतावासमा आयोजित झण्डा फहराउने समारोहमा पाकिस्तानका राजदूत एब्रार एच हाश्मीले राष्ट्रिय झण्डा फहराए। कार्यक्रममा नेपाली मित्र, पाकिस्तानी समुदायका सदस्यहरू, दूतावासका अधिकारी तथा परिवारजनहरूको उपस्थिति थियो। यस वर्षको उत्सव “मार्का-ए-हक” मा विजयको जोशका साथ सम्पन्न भयो।

समारोहमा पाकिस्तानका राष्ट्रपति आसिफ अली जरदारी, प्रधानमन्त्री मुहम्मद शहबाज शरीफ तथा उपप्रधानमन्त्री तथा विदेश मन्त्री मोहम्मद इस्हाक डारको सन्देश वाचन गरियो। वक्ताहरूले पाकिस्तानको ऐतिहासिक संघर्ष, आत्मबल, सैन्य तथा कूटनीतिक सफलता र काश्मीरको मुद्दाप्रति अटल समर्थन व्यक्त गरे।

राजदूत हाश्मीले १९४७ को ऐतिहासिक संघर्ष र हालैको “मार्का-ए-हक” मा पाकिस्तान सेनाको भूमिकाको प्रशंसा गर्दै शान्ति, प्रगति र राष्ट्रिय एकताको प्रतिवद्धता दोहोर्याए। कार्यक्रममा स्वतन्त्रता र सार्वभौमिकताको रक्षा गर्न ज्यान आहुति दिने शहीदहरूको सम्झनामा विशेष प्रार्थना गरिएको थियो।