काठमाडौं । नेपालका लागि फोटोनको आधिकारिक वितरक एमएडब्लु कमर्सियलले राजधानीको भृकुटीमण्डपमा जारी नाडा अटो शो २०२५ मा फोटोन ई–टुनल्यान्ड इलेक्ट्रिक पिकअप सार्वजनिक गरेको छ ।

ई–टुनल्यान्डमा ८८ किलोवाट आवर क्षमताको सीएटीएल ब्याट्री जडान गरिएको छ, जसले डब्लुएलटीपी मापदण्डअनुसार एकपटकको चार्जमा ३५० किलोमिटर रेन्ज प्रदान गर्छ । यसमा १३० किलोवाट क्षमताको मोटर प्रयोग गरिएको छ । दुई पाङ्ग्रे ड्राइभमा उपलब्ध सो पिकअपमा ब्याट्रीका लागि ८ वर्ष वा ४ लाख किलोमिटर र मोटरका लागि ५ वर्ष वा २ लाख किलोमिटरको वारेन्टी दिइने कम्पनीले जनाएको छ ।

सो पिकअपको बुकिङ खुला गरिएको छ भने यसको मूल्य ६९ लाख ९९ हजार रुपैयाँ तोकिएको छ । नाडा अटो शो अफरअन्तर्गत हाल १ लाख रुपैयाँ छुट उपलब्ध हुनेछ ।

ई–टुनल्यान्डको आगमनसँगै फोटोनले वातावरणमैत्री र इन्धनरहित पिकअपमार्फत नेपाली बजारमा नयाँ विकल्प प्रस्तुत गरेको छ ।