काठमाडौं, २०८२ अशोज ५ । नाडाका अध्यक्ष करण चौधरीको नेतृत्वमा गएको प्रतिनिधि मण्डलले आज सम्माननीय प्रधानमन्त्री शुशिला कार्कीसँग भेट गरी देशको वर्तमान जटिल अवस्था र त्यसले अटोमोवाइल व्यवसायमा पारेको असरबारे विस्तृत छलफल गरेको छ।

सो अवसरमा अर्थमन्त्री रामेश्वर खनाल, उर्जा, जलश्रोत तथा सिंचाइ मन्त्री कुलमान घिसिङ, गृहमन्त्री ओमप्रकाश अर्याल र मुख्य सचिव एकनारायण अर्यालको पनि उपस्थिति रहेको थियो।

अध्यक्ष चौधरीले नाडा ४९ वर्ष पुरानो संस्था भई सातै प्रदेशका अटोमोवाइल व्यवसायीहरुको प्रतिनिधित्व गर्ने संस्था भएको जानकारी गराउँदै सरकारलाई पर्याप्त रूपमा प्रस्तुत हुन नसकेकोमा दुखेसो पोखे। उनले नाडाका केही महत्वपूर्ण सुझावहरुलाई सम्बोधन गर्न सके अटोमोवाइल व्यवसाय गतिशील हुने धारणा राखे।

उक्त छलफलमा अध्यक्ष चौधरीले व्यवसायीहरूको सुरक्षा, शान्ति–सुरक्षा र आर्थिक उत्थानलाई सरकारको प्राथमिकतामा राख्नुपर्ने आवश्यकता औंल्याउँदै नाडाले सरकारसँग सहकार्य गर्दै अघि बढ्ने प्रतिबद्धता जनाए। साथै उनले सुस्ताएको अटोमोवाइल क्षेत्रलाई गतिशील बनाउन २२ बुँदे सुझाव समेत प्रधानमन्त्रीलाई पेश गरे।

विशेष गरी बैंक मार्फत सवारी साधन खरिद ऋण सीमा ६० प्रतिशतबाट बढाएर ८० प्रतिशत पुर्‍याउनुपर्ने, प्रदूषण मापदण्ड कार्यान्वयनमा देखिएका समस्या समाधान गर्नुपर्ने, उद्योग प्रवद्र्धन परिषदमा नाडाको प्रतिनिधित्व गराउनुपर्ने लगायतका विषयमा जोड दिएका थिए।

छलफलमा प्रधानमन्त्री कार्कीले व्यवसायीहरूले राखेका माग र गुनासाहरुलाई गम्भीरतापूर्वक अध्ययन गर्ने आश्वासन दिँदै, उद्योग–व्यवसायको विकासमा सरकार सदैव सहकार्यकारी हुने बताइन्। उनले “व्यवसाय नेपालमा जुवा खेल्नु सरह भएको” व्यथा पनि व्यक्त गर्दै, अबको दिनमा बैंकिङ प्रणालीलाई व्यवसायमैत्री बनाउन, व्याजदरमा सहुलियत दिन, भन्सार शुल्क घटाउन तथा निजी उत्पादनलाई उच्च प्राथमिकता दिने सरकारको योजना रहेको जानकारी गराइन्।

कार्यक्रममा नाडाका सचिव विक्रम सिंहानिया, केन्द्रीय कार्य समिति सदस्य कपिल शिवाकोटी, मेघराज पौडेल र निशान ढकालको समेत उपस्थिति थियो।