काठमाडौं । दूधकोशी हाइड्रोपावर नेपाल प्रा.लि. ले ७० मेगावाट क्षमताको दूधकोशी–२ (जलेश्वर) जलविद्युत् आयोजनाको वित्तीय बन्दोबस्त (Financial Closure) सफलतापूर्वक सम्पन्न गरेको छ।

लक्ष्मी सनराइज बैंक लिमिटेडको नेतृत्वमा, एभरेस्ट बैंक लिमिटेड सह–नेतृत्व र सनिमा बैंक लिमिटेड सदस्य रहेका बैंकहरूको कन्सोर्टियममार्फत १० अर्ब ५० करोड रुपैयाँ ऋण व्यवस्था गरिएको हो। कुल लागत करिब १५ अर्ब रुपैयाँ रहने आयोजनामा ७० प्रतिशत ऋण र ३० प्रतिशत इक्विटी रहने व्यवस्था छ।

सोलुखुम्बु जिल्लाको थुलुङ दूधकोशी गाउँपालिकामा निर्माण हुन लागेको आयोजनाको निर्माण कार्य आगामी कात्तिक २०८२ बाट सुरु हुने र करिब चार वर्षभित्र सम्पन्न गर्ने लक्ष्य राखिएको छ। आयोजनाले ६ घण्टा पीकिङ रन अफ रिभर (PROR) प्रणालीमा विद्युत् उत्पादन गर्नेछ।

वित्तीय बन्दोबस्त सम्पन्न भएपछि अब आयोजना पूर्ण निर्माण चरणतर्फ प्रवेश गर्नेछ। कम्पनीका अनुसार आयोजनाबाट उत्पादन हुने विद्युत् १२ किलोमिटर लामो १३२ केभी डबल सर्किट प्रसारण लाइनमार्फत नेपाल विद्युत् प्राधिकरणको तिनला सबस्टेसनमा जोडिनेछ।

कम्पनीका अध्यक्ष कदम केसी सहित अभिज्ञा मल्ल, विक्रम गौतम, अरुण अग्रवाल, किरण मल्ल र डा. हिमल भट्टराईलगायतले आयोजना अगाडि बढाइरहेका छन्। प्रमुख संस्थागत लगानीकर्तामा आयु मालुन हाइड्रोपावर, टिम भेन्चर, सारथी इक्विटी फन्ड्स लगायत छन्।

यो आयोजना सम्पन्न भएपछि कोशी प्रदेशको आर्थिक गतिविधि वृद्धि हुने र स्वच्छ ऊर्जाको आपूर्ति थप विश्वसनीय हुने अपेक्षा गरिएको छ।