काठमाडौं । ‘सेवा नै धर्म हो, एकता नै बल हो’ भन्ने मूल मन्त्रलाई आत्मसाथ गरी स्थापना भएको सामाजिक संस्था प्रशंसा समूहको अध्यक्षमा हरि प्रसाद अवस्थी निर्वाचित भएका छन् ।

हिजो सोमबार काठमाडौंमा सम्पन्न २७औँ साधारण सभाले अवस्थीको नेतृत्वमा ११ सदस्यीय नयाँ कार्यसमिति निर्वाचित गरेको हो । नयाँ कार्यसमितिको उपाध्यक्षमा मोहनसिंह एतवाल, महासचिवमा श्याम ओझा, सचिवमा डम्बर कुमारी रेग्मी र कोषाध्यक्षमा कमला भट्ट पोखरेल निर्वाचित भएका छन् ।

सदस्यहरूमा डा. लक्ष्मीराज पाठक, हरिमोहन भण्डारी, रमेश भट्ट, ज्वाला बिष्ट र भुवनेश्वरी भण्डारी निर्वाचित भएका छन् । कार्यसमितिमा निवर्तमान अध्यक्ष दोस्रो बरियतामा रहने निर्वाचन समितिका सदस्य उद्धव बोगटीले जानकारी दिए ।

उनका अनुसार नयाँ कार्यसमिति निर्वाचित गर्न नेत्रबहादुर शाही संयोजक रहेको तीन सदस्यीय निर्वाचन समिति गठन गरिएको थियो । सो समितिको सदस्यमा इन्दु भट्ट र उद्धव बोगटी थिए । नयाँ कार्यसमितिको कार्यकाल तीन वर्षको हुने छ ।

त्यसअघि साधारण सभामा अध्यक्ष हरिप्रसाद अवस्थीले प्रशंसा समूहको प्रगती विवरण र कोषाध्यक्ष बिशेश्वरी उप्रेतीले संस्थाको आर्थिक प्रतिवेदन प्रस्तुत गरेका थिए ।

संस्थाका संस्थापक अध्यक्ष अम्बादत्त भट्टले नव प्रवेशी सदस्यहरू टीकाराम भट्ट, नेत्रबहादुर शाही, तिलक भट्ट, चन्द्रकान्त पण्डित, इन्दु भट्ट, ललिता ठकुल्ला, भागरथी बिष्ट बसन्ती भट्टलगायतलाई संस्थाको परिचय गराउँदै स्वागत गरेका थिए । कम्तीमा दुई वर्ष संस्थाअन्तर्गत गठित समाजमा काम गरेका व्यक्तिहरूलाई मात्र सदस्यता प्रदान गरिने व्यवस्था छ । सो योग्यता पूरा गरेकाहरूलाई समाजले सदस्यका रूपमा स्वीकार गरेको बताइएको छ ।

प्रशंसा अर्थात् प्रकृति, संस्कृति तथा सामाजिकता संरक्षण समूह, पारस्परिक सहयोग, समझदारी, प्रेम र सदभावको माध्यमबाट सुसंस्कृत, इमान्दार, चरित्रवानसहितको समृद्ध समाज स्थापना गर्ने उद्देश्य बोकेर वि.स. २०५५ सालमा सामाजिक संस्था ‘प्रशंसा समूह’ गठन गरिएको थियो ।

प्रशंसा संरक्षण समूह गैरसरकारी संस्था हो । सांकृतिक उत्थान, प्रकृतिको संरक्षण र सामाजिक मूल्य मान्यताको प्रवर्द्धन गर्दै समुन्नत समाज बनाउने संस्थाको अभियानलाई आत्मसाथ गरी अगाडि बढेको यो संस्था सुदूरपश्चिमको सरोकारका विभिन्न कुराहरूको उठान गर्ने गर्दछ र त्यस भेकको सांस्कृतिक उत्थानमा अग्रसर रहँदै आएको छ ।

काठमाडौंको खुलामञ्चमा गौरा पर्वको आयोजना गरी सबै संस्कृति समुदायलाई सार्वजनिक रूपमा आफ्नो चाडपर्व मनाउन प्ररित गर्ने संस्था प्रशंसा संरक्षण समूह हो ।